![]() |
Tuesday, April 1, 2025
स्तरवृद्धिको माग गर्दे स्वास्थ्यकर्मीहरु द्वारा आन्दोलनको घोषणा
मनोज यादव----
स्तरवृद्धिको माग गर्दे सि.अ.हे.व र सि.अ.न.मि हरु आन्दोलनमा उत्रिएका छन् । सोही क्रममा सि.अ.हे.व. / सि.अ.न.मि. चौथो पाँचौ जिल्ला स्तरीय संघर्ष समितिले आज (मंगलबार )जिल्ला प्रशासन कार्यालय सर्लाहीमा प्रमुख जिल्ला अधिकारी तुलसी बहादुर श्रेष्ठलाई ज्ञापनपत्र बुझाएका छन् ।
Saturday, March 29, 2025
मलंगवा स्थित ताज गेस्ट हाउसमा भएको घटनामा संलग्न ब्यक्ति पक्राउ
लोकतन्त्र समाचारदाता----
सर्लाही,चैत १६
मलंगवा स्थित ताज गेस्ट हाउसमा भएको घटनामा संलग्न ब्यक्ति पक्राउ परेको छ।
सर्लाहीको सदरमुकाम मलंगवा नगरपालिका वडा नं. ९ स्थित बाल मन्दिर चौकमा रहेको ताज गेष्ट हाउस एण्ड लँजको कोठा नं. ९ मा गत बुधबार एक महिलाको शंकास्पद मृत्यु भएको थियो । दिउँसो करिब ३ बजे उक्त कोठामा एक महिला सिलिङ फ्यानमा कपडाको पासो लगाई झुण्डिएको अवस्थामा फेला परेकी थिइन्।
जिल्ला प्रहरी कार्यालय सर्लाहीका अनुसार घटनास्थलमा फेला परेको भारतीय आधार कार्ड र निर्वाचन आयोगको परिचयपत्रको आधारमा'आरती' नाम गरेकी मृतक महिला भारतको पहिचान दिल्ली राज्य, रोशनपुरा जिल्ला निवासी प्रविनकी २९ वर्षीया श्रीमतीको रुपमा गरिएको छ।
शव फेला परेको कोठा जिल्ला सर्लाही, हरिवन नगरपालिका वडा नं. १० निवासी ३९ वर्षीय मो. सेराजले बुक गरेको पाइएको प्रहरीले जनाएको छ। प्रहरीले उनलाई बिहिवार पक्राउ गरी आत्महत्या दुरुत्साहन गर्न नहुने कसूरमा सर्लाही जिल्ला अदालत बाट ७ दिनको म्याद थप गरी अनुसन्धान अगाडि बढाएको प्रहरी प्रवक्ता एवं डिएसपी सरोज राईले जनाएको छ।
Saturday, March 22, 2025
मुख्यमन्त्री सिंहद्वारा लालबन्दीका १९ अवैध स्वास्थ्य संस्था बन्द गर्न निर्देशन
मनोज यादव---
सर्लाही, चैत १०
मधेस प्रदेशका मुख्यमन्त्री सतिश कुमार सिंहले सर्लाहीको लालबन्दी नगरपालिकाका विभिन्न २३ वटा स्वास्थ्य संस्थाको अनुगमन गरेका छन्। अनुगमनका क्रममा कानुनी रूपमा दर्ता भई सेवा प्रदान गरिरहेका दुई संस्था मात्र अनुमतिपत्र दुरुस्त रहेको पाइएको छ भने अन्य दुई संस्थाले नवीकरण गर्नुपर्ने अवस्था देखिएको छ।
शनिबार साँझ सम्पन्न अनुगमनमा मापदण्ड अनुरूप सेवा सञ्चालन नगरेका र अनुमतिपत्रबिनै सञ्चालनमा रहेका १९ वटा अस्पताल तथा क्लिनिकलाई मुख्यमन्त्री सिंहले बन्द गर्न निर्देशन दिएका छन्। उनले स्वास्थ्य क्षेत्रलाई व्यवस्थित बनाउन अनुगमनलाई थप कडा बनाउने प्रतिबद्धता जनाएका छन्। उनलेअनुगमनका क्रममा स्वास्थ्य सेवामा लापरबाही गर्नेलाई कदापि नछाड्ने चेतावनी दिँदै प्रदेश सरकारले अवैध रूपमा सञ्चालनमा रहेका संस्थाहरूमाथि कडा कारबाही गर्ने बताए।
लालबन्दीका स्थानीयवासीहरुले मुख्यमन्त्रीको यो कदमको स्वागत गर्दै अव्यवस्थित स्वास्थ्य सेवा बन्द गर्नु सकारात्मक पहल भएको प्रतिक्रिया दिएका छन्।
मुख्यमन्त्री सिंहले यसअघि होलीको पुर्व संध्यामा सदरमुकाम मलंगवाका विभिन्न स्वास्थ्य संस्थाहरुको पनि अनुगमन गरिसकेका छन् । अनुमति बगैर संचालन भइरहेका अस्पताल तथा क्लिनिकहरुलाई बन्द गर्ने निर्देशन दिइएपनि ती स्वास्थ्य संस्थाहरु यथावत संचालन भइनै रहेका छन् ।
Monday, January 27, 2025
सम्माननीय उपराष्ट्रपति यादव र म्यानमारका राजदूत म्योम्यिन्टमाउङबीच शिष्टाचार भेटवार्ता
लोकतन्त्र समाचारदाता---
सर्लाही,माघ १४
सम्माननीय उपराष्ट्रपति श्री रामसहाय प्रसाद यादवज्यूसंग नेपालका लागि म्यानमारका महामहिम राजदूत श्री यु म्योम्यिन्टमाउङले शिष्टाचार भेटवार्ता गर्नुभएको छ ।
लैनचौरस्थित उपराष्ट्रपतिको कार्यालयमा सोमबार भएको भेटमा शुभकामना आदानप्रदान पश्चात दुई मुलुकबीच द्विपक्षीय सम्बन्ध, क्षेत्रीय तथा बहुपक्षीय, आर्थिक सामाजिक एवम् सांस्कृतिक सम्बन्ध लगायतका विषयमा छलफल भयो ।
उपराष्ट्रपति यादवले सन् १९६० मार्चमा कूटनीतिक सम्बन्ध स्थापना भएयता नेपाल र म्यानमारबीचको द्विपक्षीय सम्बन्ध थप प्रगाढ बन्दै गएको बताउनुभयो । ‘यो वर्ष (सन् २०२५) हामी नेपाल र म्यानमारबीच कूटनीतिक सम्बन्ध स्थापनाको ६५ औं वार्षिकोत्सव मनाइरहेका छौं’ उहाँले भन्नुभयो, ‘हाम्रा दुई देशहरुबीचको बर्षौं पुरानो सम्बन्ध पारस्परिक सद्भाव, सम्मान, विश्वास र सहकार्यमा आधारित रहेमा दुई देशबीचको सम्बन्धलाई सांस्कृतिक मूल्य मान्यताहरूले अझ मजबुत बनाएको छ ।’
उपराष्ट्रपति यादवले दुई देशका परराष्ट्र मन्त्रालयबीच सन् २०१८ मा द्विपक्षीय परामर्श संयन्त्र स्थापना, कूटनीतिक र सरकारी पासपोर्ट वाहकका लागि भिषा उन्मुक्ति दिने सम्झौता सम्पन्न भएकोमा खुशी व्यक्त गर्नुभयो । ‘नेपाल र म्यानमार दुवै बिमस्टेकको सदस्यका रुपमा सहकार्य गर्दै आएका छन् ’ उहाँले भन्नुभयो, ‘बिमस्टेकले दक्षिण एसिया तथा दक्षिणपूर्व एसियाबीच अन्तरक्रिया र सहकार्य बढाउँदै समग्र क्षेत्रको आर्थिक र सामाजिक रुपान्तरणमा सहयोग गर्ने उद्देश्य राखेको छ ।’ उहाँले अति कम विकसित राष्ट्रहरूको मुद्दामा नेपाल र म्यानमार दुवै आर्थिक हितका लागि सहकार्य गर्दै आएका पनि बताउनुभयो ।
‘आगामी दिनमा नेपाल र म्यानमारबीच सम्पन्न भएका व्यापार तथा लगानी, पर्यटन एवं सांस्कृतिक सहकार्य सम्बन्धी समझदारीहरूको कार्यान्वयन भई दुई देश बीचको आर्थिक सम्बन्ध र सहकार्य थप प्रगाढ र विस्तार हुनेछ भन्नेमा विश्वस्त छु’ उपराष्ट्रपति यादवले भन्नुभयो, ‘हाम्रा दुई देशको भाषा संस्कृति र रहनसहनमा समानता छ । बौद्ध दर्शन र संस्कृति दुवै देशको साझा सम्पदाको रूपमा रहेको छ। लुम्बिनी बुद्धको जन्मस्थल र बौद्ध दर्शनको उद्गमस्थल हो ।’
उहाँले बौद्ध धर्मावलम्बीहरूको लागि नेपाल एउटा पवित्र तीर्थ हुनुका साथै बुद्धका शान्ति, सद्भाव, सहिष्णुता र करूणा जस्ता सन्देशमा विश्वास राख्ने सबैका लागि एउटा आस्था र सम्मानको थलो भएको बताउनुभयो । ‘यसले नेपाल र म्यानमारबीच पर्यटन र सांस्कृतिक सहकार्यको समेत मार्गप्रशस्त गरेको छ’ उपराष्ट्रपति यादवले भन्नुभयो, ‘लुम्बिनी म्यानमारका तिर्थयात्रीहरुको मुख्य गन्तव्यस्थलका रुपमा रहेको छ । लुम्बिनी परिसरमा रहेको म्यानमार स्वर्ण मन्दिरले पनि नेपाल एवं म्यानमारका जनताबीचको सुमधुर सम्बन्धलाई अझ प्रगाढ बनाएको छ ।’
नेपाल र म्यानमारबीचको सम्बन्ध सुदृढीकरणमा तपाईँ (महामहिम राजदूत) ले महत्वपूर्ण भूमिका निर्वाह गर्नु हुने उल्लेख गर्दै उपराष्ट्रपति यादवले म्यानमारको ७७ औं स्वतन्त्रता दिवसको अवसरमा सम्पूर्ण म्यानमारी जनताको सुख, शान्ति, समृद्धि र उत्तरोत्तर प्रगतिको कामना सहित हार्दिक शुभकामना समेत व्यक्त गर्न गर्नुभयो ।
नेपालका लागि म्यानमारका महामहिम राजदूत श्री यु म्योम्यिन्टमाउङले नेपाल र म्यानमार भगवान बुद्धलाई एकनासले सम्मान गरेको उल्लेख गर्दै बुद्धको जन्मभूमि नेपालमा काम गर्ने मौका पाएकोमा खुशी व्यक्त गर्नुभयो । ‘नेपाल र म्यानमारबीच जनस्तरको सम्बन्ध छ’ उहाँले भन्नुभयो, ‘ नेपालको ‘नन–अलायन्स’ जस्तै म्यानमारको पनि नीति रहेको छ । क्षेत्रीय र अन्तर्राष्ट्रिय मञ्चहरुमा नेपालको ‘नन–अलायन्स’ नीतिको म्यानमार प्रशंसा गर्दछ । ’ महामहिम राजदूतले नेपालको स्वतन्त्र विदेश नीतिलाई म्यानमारले सम्मान र प्रशंसा गरेको समेत बताउनु भयो ।
Thursday, January 23, 2025
वाणिज्य बैंक शाखा मलंगवाले गरे दुईजना असल ऋणीलाई सम्मान
लोकतन्त्र समाचारदात---
सर्लाही,माघ १०
राष्ट्रिय वाणिज्य बैंक शाखा मलंगवाले आफ्ना दुईजना असल ऋणीहरुलाई सम्मानित गरेको छ। बैंकले बिहीबार आफ्नो ६० औं वार्षिकोत्सव मनाउने क्रममा असल ऋणीद्वय शिव दुलारी महतो सुँढी र ममता कुमारी महतोलाई कदरपत्र द्वारा सम्मान गरेको हो।
शाखा प्रबन्धक सुशीला कुमार महतोको अध्यक्षतामा आयोजना भएको वार्षिकोत्सब समारोहको प्रमुख अतिथि मधेस प्रदेश सरकारका श्रम तथा यातायात मन्त्री कौशल किशोर रायले केक काटेर उद्घाटन गरेका थिए। मलंगवा नगरपालिका वडा न-९ मा कार्यालय रहेको यश बैंकको वार्षिकोत्सब समारोहमा नेपाली काँग्रेस नगर कमिटी मलंगवाका निवर्तमान अध्यक्ष चन्द्र किशोर साह लगायत उक्त शाखाका कर्मचारी,बुद्धिजीवी खाताधारी र पत्रकारहरुको उपस्थिति रहेको थियो।
राष्ट्रिय वाणिज्य बैंक नेपालकै पुरानो र प्रतिष्ठित बैंकहरूमध्ये एक हो, जसले ६० वर्षदेखि देशभर आफ्ना ग्राहकहरूलाई आर्थिक सेवा प्रदान गर्दै आएको छ। वाणिज्य बैंकको २६४ औ शाखाको रुपमा रहेको मलंगवा शाखाले पनि आफ्नो क्षेत्रका ग्राहकहरूको वित्तीय आवश्यकतामा योगदान पुर्याउँदै आएको छ।
Monday, December 9, 2024
पत्रकार महासंघको केन्द्रीय सदस्यमा सर्लाहीका बख्तियार अलीको उम्मेदवारी
लोकतन्त्र समाचारदाता---
सर्लाही,मंसिर २४
नेपाल पत्रकार महासंघको केन्द्रीय सदस्यको लागि सर्लाहीका पत्रकार बख्तियार अलीले उम्मेदवारी दिएका छन्।
मंसिर २८ गते हुने नेपाल पत्रकार महासंघको ५२ सदस्यीय केन्द्रीय कार्यसमितिका लागि पत्रकार अलीले अल्पसंख्यक कोटाबाट उमेदवारी दिएका हुन् । विगत दुई दशक भन्दा बढी समयदेखि पत्रकारितामा लागेका पत्रकार अली एभिन्युज टेलिभिजनका लागि सर्लाही जिल्ला सम्वाददाताको रुपमा कार्यरत छन् ।
उनले श्रमजीवी पत्रकारहरुको साझा प्यानलबाट उमेदवारी दिएका छन् ।
Thursday, December 5, 2024
सर्लाहीको जमुनियामा अर्थमन्त्री यादव द्वारा पञ्चवर्षीय गढीमाई मेलाको उद्घाटन
मनोज यादव---
सर्लाही,मंसिर २०
मधेस प्रदेश सरकारका अर्थमन्त्री सुनिल कुमार यादवले सर्लाहीको कबिलासी नगरपालिका वडा नम्बर -६ जमुनिया स्थित गढीमाई मन्दिरमा लागेको पञ्चवर्षीय मेला महोत्सव २०८१ को उद्घाटन गरेका छन् ।
बिहीबार एक समारोहका बिच प्रमुख अतिथि अर्थमन्त्री यादवले जमुनिया स्थित गढीमाई मेलाको विधिवत रूपमा उद्घाटन गरेका हुन। उद्घाटन समारोहमा अर्थमन्त्री यादवका साथै श्रम तथा यातायात मन्त्री कौशल किशोर राय,पुर्व रक्षामन्त्री हरि उप्रेती ,मधेस प्रदेश सांसद जंगीलाल राय,शकुन्तला देवी राम,नेपाली काँग्रेस मधेस प्रदेश सभापति तथा पुर्व मन्त्री कृष्ण कुमार यादव,नेपाली काँग्रेस सर्लाहीका पुर्व सभापति लक्षमण राय,जिल्ला समन्वय समिति सर्लाहीका प्रमुख कौशल किशोर सिंह ,कबिलासी नगरपालिकाका प्रमुख ब्रम्हदेव राय,उपप्रमुख पुनम कर्ण,कबिलासी नगरपालिकाका पुर्व नगर प्रमुख कौशल यादव लगाएतको सहभागिता रहेको थियो।
बिश्व प्रसिध्द बारा स्थित गढीमाई मेलाकै तिथि मितिमा बृहत रुपमा जमुनिया गढीमाई मेलाको आयोजना गरिएको छ। यस गढीमाई मन्दिरमा विगत झै यसपटक पनि धुमधामका साथ पञ्चवर्षीय मेलाको आयोजना गरिएको हो।
गढी माई मेला मूल समितिका अध्यक्ष एवं कबिलासी नगरपालिका वडा नम्बर -६ का वडाअध्यक्ष पुरुषोत्तम यादवले यो मेला उद्घाटन भएको दिन मंसिर २० गते बिहिवारदेखि नै लागेको बताएका छन्। कलश यात्रा गत मंसिर १४ गते नै सम्पन्न भइसकेकोले मंसिर २२ गते शनिवार गढी माईको विशेष पुजा गरिसके पश्चात् मंसिर २३ गते आइतवार राँगा बली र २४ गते सोमबार बोका बली दिइने कार्यक्रम रहेको जानकारी गराउँदै उनले सम्पूर्ण श्रद्धालु भक्तजनहरुलाई मेलामा सहभागी भएर मेलाको शोभा बढाइ दिन अनुरोध गरेका छन् ।
मेलामा सर्लाहीसहित छिमेकी जिल्लाहरु रौतहट ,महोत्तरी, बारा लगायत सीमावर्ती भारतबाट लाखौँ मानिस आउने गरेको आयोजकले जनाएको छ। दर्शन गर्न आउने बाहिरका भक्तजन तथा आगन्तुकलाई मेला समितिको तर्फबाट निःशुल्क खाना र बस्ने व्यवस्था मिलाइएको गढीमाई मेला समितिले जनाएको छ।
उक्त मेलामा मनोरञ्जनका लागि विभिन्न खेल तमासा ,नाचको साथै नेपाल र भारतका प्रसिद्ध पहलवानहरुको कुस्ती समेतको व्यवस्था गरिएको समितिले जनाएको छ।
मेलामा आउने भक्तजनको सुरक्षाका लागि सयौं स्वयंसेवकहरु सँगै प्रहरीहरु समेत परिचालन गरिएको समितिले जनाएको छ।
मन्दिरमा राँगा, बोका, परेवाको बलि दिइने गरिन्छ।
Subscribe to:
Posts (Atom)