माण्डवीद्वारा सर्लाहीमा संचालित शी लिड्स परियोजना सफल रहेको निष्कर्ष

 

माण्डवीद्वारा सर्लाहीमा संचालित शी लिड्स परियोजना सफल रहेको निष्कर्ष

लोकतन्त्र समाचारदाता---

सर्लाही,फाल्गुन १४

       सर्लाही  जिल्लामा माण्डवी द्वारा संचालित शी लिड्स परियोजनाको जिल्ला परियोजना सल्लाहकार समिति बैठक सदरमुकाम मलंगवामा  सम्पन्न भएको छ । 

     आइतवार जिल्ला समन्वय समिति प्रमुख कौशल किशोर सिंहको प्रमुख आतिथ्यतामा सम्पन्न भएको बैठकमा आइ.एफ.इ.एस तथा अस्ट्रेलियन सरकारको प्राविधिक तथा स्विस सरकारको आर्थिक सहयोगमा २०२१ जुलाई देखि २०२३ नोभेम्बर सम्म जिल्लाको हरिवन ,बागमती ,बरहथवा,कबिलासी र हरिपुर्वा नगरपालिकामा संचालन भएको शि लिड्स महिला नेतृत्व कार्यक्रमको समीक्षा तथा सुझाव संकलन गरिएको छ।

     संस्थाले  परियोजना संचालन गरेको दुई वर्षको अवधिमा स्थानीय तहको निर्वाचनमा निर्वाचित भएर आएका महिला जनप्रतिनिधिहरुलाई शसक्त बनाउने उद्देश्यले  विभिन्न मोड्युलमा प्रशिक्षण दिएका थिए। ती पाँचवटै नपा कार्यपालिकाका नवनिर्वाचित महिला सदस्यहरुको नेतृत्व भूमिकालाई निरन्तरता दिंदै उनीहरूको आत्मविश्वास र नेतृत्व सिपलाई अझ निखार्दै उनीहरूको भूमिकालाई अझ बढी प्रभावकारी ढंगबाट निर्वाह गर्न थप सीप र ज्ञानको विकास गर्ने उद्देश्यले तालिमको आयोजना गरि महिला जनप्रतिनिधिहरुलाई स्थानीय सरकारमा प्रभावकारी ढंगले भूमिका निर्वाह गर्नको लागि चाहिने सीप र ज्ञान प्रदान ,राजनीतिक संवादमा सहभागी हुनका लागि उनीहरुको आत्मविश्वास बढाउने,लैंगिक समानता प्रवर्द्धन गर्न आफ्नो समुदायका अन्य बालिका र महिलाहरुको लागि प्रेरणाको श्रोतको रुपमा कार्यगर्न प्रोत्साहित गर्न,लैंगिक समानता प्रबर्द्धन गर्नका लागि समुदायमा पुरुष सहयोगीहरुको निर्माण गर्न तथा स्थानीय तहमा निर्वाचित महिला जनप्रतिनिधिहरुले एकआपसमा अनुभवको आदानप्रदान र सहयोग गर्न संजालको निर्माण गर्ने विषयमाहरुमा प्रशिक्षण दिइएको माण्डवीका कार्यक्रम अधिकृत मनिल श्रेष्ठले जानकारी  दिए।उनीहरुलाई समूहकार्य,बैठकको योजना र व्यवस्थापन ,स्थानीय तहको विधायिकी कार्य प्रणाली,सक्रिय सुनवाइ ,संजालिकरण,संचार माध्यम सँग सहकार्य,विकास ,समुदाय परिचालन र व्यक्तिगत विकासका लक्ष्य तथा कार्ययोजनाको विषयमा समेत  जानकारीमूलक प्रशिक्षण दिएको श्रेष्ठले  बैठकमा सहभागीहरुलाई  जानकारी गराए।

    जिल्ला समन्वय समितिको सभाहलमा आयोजना गरिएको बैठकमा श्रेष्ठले परियोजनाबाट प्राप्त भएका उपलब्धिहरुको बारेमा जानकारी गराउँदै हालै सम्पन्न स्थानीय तहको निर्वाचनमा पुनः निर्वाचित भएका २९ जना महिला सदस्यहरुको बुट क्याम्प तालिम पछि महिला जनप्रतिनिधिहरुले आफ्नो कार्य योजना बनाएर कार्य गर्ने आत्मविश्वास बढेको ,समुदायमा गई छलफल गर्ने बढेको ,लैंगिक समानताका लागि समुदाय तथा वडा समितिमा रहेका पुरुषहरु पनि महिला सहयोगीको रुपमा प्रतिबद्ध हुन थालेको,प्रभावकारी ढंगले आफ्नो काम,कर्तव्य र जिम्मेवारीको भूमिका निर्वाह गर्नको लागि आवश्यक शिप र ज्ञान प्राप्त भएको,राजनैतिक नेतृत्वमा महिला सक्रियता बढेको सम्बन्धि विषयहरु संचार माध्यमहरु बाट उजागर हुन थालेको जानकारी गराए।महिला जनप्रतिनिधिहरु महिला संजाल गठन गर्न तथा बस्ती तहको योजना तर्जुमामा नेतृत्व गर्न सफल भएका छन्। विभिन्न सरोकारवालाहरु ,राजनैतिक दल र पालिका वडाहरुको बिचमा गहिरो सम्बन्ध र भूमिकाले पनि मान्यता पाएको साथै उनीहरू लैंगिक समानता तथा सामाजिक समावेशीकरण नीति तयार गर्ने र निर्णय गर्ने भएको कार्यक्रम अधिकृतले जानकारी गराए।

    कार्यक्रममा सहभागी भएका विशिष्ट अतिथि प्रमुख जिल्ला अधिकारी इन्द्रदेव यादव,प्रहरी उपरीक्षक नरेशराज सुवेदी ,सशस्त्र प्रहरी उपरीक्षक ,अनुसंधान प्रमुख ,जिल्ला निर्वाचन कार्यालय प्रमुख ,विभिन्न राजनैतिक दलका जिल्ला  प्रमुख ,परियोजना संचालित पालिकाका प्रमुख तथा तिनका प्रतिनिधि ,विभिन्न गैरसरकारी संघसंस्थाका प्रतिनिधि लगायतका अतिथिहरु  माण्डवीले पुरुषमुखी समाजमा विद्यमान  नकारात्मक सामाजिक मान्यतालाई  चिर्दै स्थानीय तहमा महिला जनप्रतिनिधिहरुको रुपमा अगाडी आएका महिलाहरुको  नेतृत्व भूमिकालाई निखारेर राम्रो काम गरेको भन्दै प्रशंसा गर्दै  परियोजना सफल भएको निष्कर्ष निकालेका थिए।