अधिकार प्राप्त सार्वजनिक स्रोत र सेवाहरुमा पहुँच सुधार गर्न अन्तरक्रिया

 

अधिकार प्राप्त सार्वजनिक स्रोत र सेवाहरुमा पहुँच सुधार गर्न  अन्तरक्रिया

लोकतन्त्र समाचारदाता---

सर्लाही,जेष्ठ ११

     सर्लाहीको मलंगवामा अधिकार प्राप्त सार्वजनिक स्रोत र सेवाहरुमा पहुँच सुधार गर्न  कौडेना गाउँपालिकाका सेवा प्रदायक तथा लक्षित समूहहरु बीच अन्तरक्रिया  गरिएको छ। सि.इ.सी.आई. को सहयोग ,रास्ट्रिय रोजगार प्रवर्धन केन्द्र (आर.आर.पि.के )को समन्वय तथा कौडेना गा.पा को आयोजनामा  बिहिवार मलंगवा स्थित महेन्द्र होटलको सभाहलमा कार्यक्रमको सम्पन्न भएको हो।

  कोभिड-१९पुनर्स्थापना तथा  जिविकोपार्जन(कोरेल)परियोजना  अन्तर्गत संचालन भएको कार्यक्रममा कौडेना गा.पा.का आम नागरिकहरुले भोग्दै आएका समस्या र आगामी दिनमा त्यस्को समाधानका लागि गरिने  उपाय तथा पालिकाबाट प्रदान गरिने सेवा सुविधाहरुको विषयमा सेवा प्रदायक तथा लक्षित समूहहरु बीच  अन्तरक्रिया गरिएको थियो।  

    कार्यक्रममा  आर.आर.पि.के का कार्यक्रम संयोजक जयनेन्द्र कुमार शाहले आम जनताको जिविकोपार्जनका लागि केन्द्रले सर्लाहीका सातवटा पालिकाहरुमा  विभिन्न परियोजनाहरु मार्फत कार्यक्रम संचालन गरिरहेको जानकारी गराएका थिए। आगामी दिनमा पनि यसैगरी सम्बन्धित पालिकासँग समन्वय गरि आम नागरिकहरुको जीवनस्तर उकास्ने खालका विभिन्न परियोजनाहरु संचालन गर्ने संयोजक शाहले बताएका थिए।

     कौडेना गा.पा का उपाध्यक्ष नगिना  देवी यादवको अध्यक्षता तथा आर.आर.पि.के का अध्यक्ष गायत्री देवी महतोको प्रमुख आतिथ्यतामा सम्पन्न भएको कार्यक्रममा उपस्थित विशिष्ठ अतिथि प्रमुख प्रशासकीय अधिकृत शम्भु प्रसाद यादवसहित विभिन्न शाखाका शाखा प्रमुख र जनप्रतिनिधिहरुले स्थानीय लक्षित समूह र ब्यक्तिहरुबाट उठेका समस्या र ती समस्याहरुको समाधानका लागि पालिकाको तर्फबाट  चालेका कदम तथा आगामी योजनाहरुको बारेमा जानकारी गराएका थिए।

     पत्रकार स्नेहा झा ले सहजीकरण गरेको  कार्यक्रममा केन्द्रका कार्यक्रम निर्देशक  शिवजी साह, सि.इ.सि.आइ की सूर्य लक्ष्मी बज्राचार्य,सबै वडाका वडाअध्यक्ष,कर्मचारी ,लक्षित समूह, सरोकारवालाहरु लगायत पत्रकारहरुको उपस्थित रहेको थियो।