थप दुई जना कोरोना संक्रमित भेटिए, संख्या ५१ पुग्यो

काठमाडौं । स्वास्थ्य तथा जनसंख्या मन्त्रालयका अनुसार थप दुई जनामा कोरोना भाइरस (कोभिड-१९) को संक्रमण पुष्टि भएको छ । संक्रमित हुनेमा यसअघि वीरगञ्ज छपकैयास्थ्ति जामे मस्जिदमा रहेका तीन भारतीय संक्रमितको सम्पर्कमा आएका दुई जना पुरुष रहेका छन् ।

संक्रमित दुई जनाको संख्या थपिएसँगै नेपालमा संक्रमितको संख्या ५१ पुगेको छ ।

उनीहरुको राष्ट्रिय जनस्वास्थ्य प्रयोगशालामा गरिएको पिसिआर परीक्षणमा नतिजा पोजेटिभ आएको हो । उनीहरुको स्वास्थ्य अवस्था सामान्य रहेको छ भने संक्रमित दुवै जनालाई  उपचारका लागि नारायणी अस्पताल लगिएको बताइएको छ ।

यसैबीच, यअअघि संक्रमित तीन जना भारतीय नागरिकहरुको स्वस्थ्य भएपछि उनीहरुको आज डिस्चार्ज गर्ने तयारी भइरहेको नारायणी अस्पतालले जानकारी दिएको छ ।