कोरोना संक्रमित धनकौलका किशोरका परिवार सहित २६ जनाको रिपोर्ट नेगेटिभ आयो, ९० जनाको रिपोर्ट आउन बाँकी

सर्लाही ,बैशाख १४ ।

     सर्लाहीको  धनकौल गाउँपालिकाका कोरोना भाईरस (कोभिड–१९) संक्रमित किशोरका परिवार सहित २६ जनाको स्वाब परीक्षण रिपोर्ट नेगेटिभ आएको छ ।

     प्रमुख जिल्ला अधिकारी मोहनबहादुर जिसीका अनुसार धनकौलबाट संकलन गरिएका सबै २६ जनाको रिपोर्ट नेगेटिभ आएको हो । ‘कोरोना भाईरसबाट संक्रमित भएका १४ वर्षीय किशोरका परिवारका ५ जना सदस्य सहित उनले नजिकबाट सम्पर्क गरिएको अनुमानमा धनकौल गाउँपालिकाबाट स्वाब संकलन गरिएका २६ जनाकै रिपोर्ट नेगेटिभ देखिएको लिखित पत्र टेकु अस्पतालबाट आएको प्रजिअ जिसीले जानकारी गराउनु भएको  छ ।धनकौल गाउँपालिका वडा न–५ हरकठवा गोठ गाउँका १४ वर्षीय  किशोर राहुल कुमार महतोको स्वाब काठमाडौंको टेकु अस्पतालमा गरिएको पीसीआर परीक्षणमा कोरोना भाईरस पोजेटिभ आएको थियो । गत वैशाख ५ गते शुक्रबार आरडीटी पोजेटिभ देखिएपछि ती किशोरलाई धनकौलको क्वारेन्टाईनबाट थप परीक्षणका लागि प्रादेशिक अस्पताल जनकपुर पठाईएको थियो । उनी र उनीसँगै क्वारेन्टाईनमा बसेका अर्का एकजनालाई पनि उनी सँगै जनकपुर पठाएर दुईपटकसम्म गरीएको पीसीआर परीक्षणमा नेगेटिभ रिपोर्ट आएपछि दुवैजनालाई आईतबार पुनः धनकौल गाउँपालिकाकै क्वारेन्टाईनमा फर्काईएको प्रजि जिसीले जानकारी दिए ।‘प्रादेशिक अस्पताल जनकपुरबाट दुईवटा रिपोर्ट नै नेगेटिभ आएपछि बुधबार १४ दिन पुगेकाले ती किशोरलाई क्वारेन्टाईनबाट होम क्वारेन्टाईनमा पठाईएको थियो’, प्रजिअ जिसीले भने, ‘अनि विहिबार त काठमाडौंको टेकु  अस्पतालबाट पोजेटिभ रिपोर्ट आएपछि तत्कालै सुरक्षाकर्मी  पठाएर किशोरको घर परिवारलाई नियन्त्रणमा लिएर राखेको उहाँले बताए ।

     शुक्रबार विश्व स्वास्थ्य संगठन, नेपाली सेना लगायत सुरक्षानिकायका स्वास्थ्यकर्मीहरुको टोलीले दिनभर लगाएर धनकौल सहित जिल्लाका विभिन्न स्थानबाट ११६ जना सर्वसाधारणको स्वाब संकलन गरेर परीक्षणका लागि काठमाडौं लगेको थियो । प्रजिअ जिसीका अनुसार धनकौल गाउँपालिकामा कोरोना भाईरस पोजेटिभ देखिएका किशोरका परिवार एवं उक्त गाउँका स्थानीय सहित जिल्लाको विभिन्न स्थानमा पालिकाहरुले क्वारेन्टाईनमा राखेका सर्वसाधारणहरुको स्वाब संकलन गरिएको हो । कोरोना भाईरस पोजेटिभ देखिएका किशोरका परिवारका सदस्य एवं ती किशोरसँग नजिकबाट सम्पर्क भएको आशंका गरिएका सर्वसाधारणहरु तथा लकडाउन छिचोल्दै भारतबाट छिर्न सफल विभिन्न पालिकाहरुको क्वारेन्टाईनमा बसेका सर्वसाधारणको स्वाब संकलन गरिएको प्रजिअ जिसीले जानकारी दिए ।

धनकौल बाहेक चन्द्रनगर गाउँपालिकाको क्वारेन्टाईनमा राखिएका ७५ जना तथा ईश्वरपुर नगरपालिकाको क्वारेन्टाईनमा राखिएका १५ जनाको स्वाब सो टोलीले संकलन गरेर लगेको छ । चन्द्रनगर र ईश्वरपुरको क्वारेन्टाईनमा राखिएकाहरुको स्वाबको रिपोर्ट भने नआईसकेको प्रजिअ जिसीले जानकारी दिए ।

    सर्लाहीबाट ११८ जना सर्वसाधारणको स्वाब परीक्षणका लागि संकलन भईसकेको छ ।