सर्लाहीकै पहिलो मलंगवा नगरपालिकाको १० औं नगरसभाको उद्घाटन सम्पन्न

 

सर्लाहीकै पहिलो मलंगवा नगरपालिकाको १० औं  नगरसभाको उद्घाटन सम्पन्न

मनोज यादव---

सर्लाही,असाढ १०

     सर्लाही जिल्लाकै पहिलो  नगरपालिका तथा जिल्लाको सदरमुकाम मलंगवा नगरपालिकाको १० औं  नगरसभाको उद्घाटन सत्र सम्पन्न भएको छ ।पालिकाले आ.व २०८०/०८१ को लागि नेपाल सरकार,प्रदेश सरकार र आन्तरिक स्रोत समेत गरि कुल ५५ करोड ४८ लाख ६१ हजार रुपैया अनुमानित बजेट प्रस्तुत गरेको छ।

     आइतवार आयोजना भएको सभामा नगरप्रमुख नागेन्द्र प्रसाद यादवले  आर्थिक वर्ष २०८०/०८१ को लागि नीति तथा कार्यक्रम प्रस्तुत गर्दै स्वास्थ्य, शिक्षा,खेलकुद, कृषि, सडक, भौतिक विकास निर्माण ,रोजगारी ,सामाजिक सुरक्षा र विपद व्यवस्थापन, पर्यावरण, महिला बालबालिका तथा सामाजिक समावेशीकरण ,सूचना तथा संचार प्रविधि ,शहर सौर्न्दर्यीकरण र बजार अनुगमन,निजी व्यवसाय सहकारी तथा आर्थिक क्रियाकलाप लगायतलाई  प्राथमिकतामा राखेर आउँदो आर्थिक वर्षको बजेट ल्याउन लागेको  बताउनुभयो । उहाँले नगरपालिकालाई जनतामा समर्पित संस्थाका रुपमा स्थापित गर्ने हाम्रो प्रयास रहेकोले यी सबै कामका लागि "हाम्रो नीति र नियतमा इमानदारीता र निरन्तरता साथै हाम्रो होइन राम्रो हुनुपर्छ " भन्ने मान्यता अनुसार आफुले काम गरेको बताउनुभयो ।

    नगरसभामा स्वागत मन्तव्य राख्दै नगर उपप्रमुख शकुन्तला देवी साहले आउँदो आ.व को बजेट जनमुखी रहेकोले यसलाई कार्यान्वयनमा ल्याउन सबैलाई साथ दिन आग्रह गर्नुभयो ।

   सोही अवसरमा गत आर्थिक वर्ष २०७९/०८० को नीति तथा कार्यक्रमको समीक्षा गरि सुझाव समेत संलकन गरिएको थियो।

 

प्रमुख प्रशासकीय अधिकृत गेहनाथ गौतमले संचालन गरेको उद्घाटन सत्रमा वडाध्यक्ष, कार्यपालिका सदस्य, वडा सदस्य ,पत्रकार लगायत कर्मचारीहरुको सहभागिता रहेको थियो ।