मलंगवा नगरपालिकाको मुख सडक निर्माण तथा बसपार्क संचालन सम्बन्धमा सर्वपक्षीय समन्वयात्मक बैठक सम्पन्न 

लोकतन्त्र समाचारदाता---

सर्लाही,पुस १४

   सर्लाहीको सदरमुकाम मलंगवा नगरपालिकाको मुख सडक निर्माण तथा बसपार्क संचालन सम्बन्धमा सर्वपक्षीय समन्वयात्मक बैठक सम्पन्न भएको छ।

   बिहीबार नगरप्रमुख नागेन्द्र प्रसाद यादवको अध्यक्षतामा उक्त बैठक सम्पन्न भएको हो।मलंगवा नपाको सभा हलमा सम्पन्न भएको उक्त बैठकमा नगरपालिकाले  वडा न-९ श्रीमती कृष्णा देवी जनता माद्यामिक विद्यालयदेखि वडा न-८ राजश्री सिनेमा हलसम्मको मूल सडकमा सडक कालोपत्रे तथा नाला निर्माणको कार्य गर्न लागेकोले सो सडकमा मापदण्ड अनुसार परेका भौतिक संरचनाहरु हटाउन र मलंगवा नपा-२ स्थित जिल्ला प्रहरी कार्यालयको छेउमा भेडियाही जाने मुख्य सडकमा निर्माण सम्पन्न भई तयारी अवस्थामा रहेको करोडौंको लागतको बसपार्क संचालनको विषयमा छलफल गरिएको थियो।

    सो छलफलबाट  कृष्णा देवी स्कुल हुँदै बालमन्दिर चौक देखि पश्चिम वडा न-८ स्थित नगरपालिका चौक,नेपाल बैंक लिमिटेड हुँदै राजश्री सिनेमा हलसम्मको मुल सडकमा  कालोपत्रे सडक तथा नाला निर्माणकोलागि १५ मिटर सडक चौडाइ रेखाङ्कन भए अनुसार मापदण्ड भित्र पर्ने भौतिक संरचनाहरु     पुस ८ गते राष्ट्रिय  दैनिक लोकतन्त्र पत्रिकामा सूचना प्रकाशित भएको मितिले १५ दिनभित्र हटाउन साथै मलंगवा-२ मा रहेको बसपार्क पनि माघ मसान्तमै संचालनमा ल्याउने सर्वपक्षीय सहमती भएको नगरपालिकाले जनाएको छ।