२०४७ को संविधान जारी तथा राजसंस्था पुनर्स्थापना हुनुपर्छ -प्रेम श्रेष्ठ

 

लोकतन्त्र समाचारदाता---

सर्लाही ,असोज ५

      सातौं संविधान दिवसको अवसर पारेर राजसंस्था पुनर्स्थापना संघर्ष समिति सर्लाहीले २०४७ को संविधान जारी गर्ने मागको सम्बन्धमा बैठकको आयोजना गरि गणतान्त्रिक संविधानको विरोधको कार्यक्रमहरु गर्ने निर्णय गरेको छ ।

     सर्लाहीको सदरमुकाम मलंगवा नगरपालिका वडा न-८ स्थित मोहरशिंह धर्मशालामा गत आइतवार संघर्ष समितिका केन्द्रीय सदस्य प्रेम श्रेष्ठको अध्यक्षतामा बसेको बैठकबाट २०४७ सालको संविधान जारी हुनुपर्ने ,संघीयता खारेज हुनुपर्ने ,राजसंस्था पुनर्स्थापना हुनुपर्ने तथा नेपाल हिन्दुराज्य कायम हुनुपर्ने लगायतका मागहरुको विषयमा   निर्णय गरिएको समितिले जनाएको छ ।

     समितिका सदस्य  रामजी चौधरीको प्रमुख  आतिथ्यता रहेको  बैठकमा विरेन्द्र कर्ण,सीता मैनाली ,सरस्वती मैनाली ,गंगाराम राय,रामएकवाल राय,सुकेश्वर ठाकुर लगायत संघर्ष समितिका सदस्यहरुको उपस्थित रहेको थियो ।