श्रमजीवी पत्रकारको लागि न्युनतम पारिश्रमिक निर्धारण समितिले आयोजना गरेको कार्यक्रम उपलब्धि विहिन रहेको पत्रकारहरुको गुनासो

 

लोकतन्त्र समाचारदाता---

सर्लाही,जेठ १०

    श्रमजीवी पत्रकार ऐन कार्यान्वयन र जिल्लाको अवस्था विषयक अन्तरक्रिया गोष्ठी  सर्लाहीको लालबन्दीमा सम्पन्न भएको छ।

     जिल्ला भित्र तथा जिल्ला बाहिरका विभिन्न संचार माध्यममा कार्यरत श्रमजीवी पत्रकारहरुले सरकारले निर्धारण गरेको पारिश्रमिक पाए नपाएको तथा श्रमजीवी पत्रकार ऐन कार्यान्वयनको अवस्था, चुनौती र भावी रणनीतिको विषयमा जानकारी लिन र जानकारी दिने उदेश्यले कार्यक्रमको आयोजना गरिएको हो।

    बुधबार लालबन्दी नगरपालिका स्थित युनाइटेड होटलको सभाहलमा नेपाल पत्रकार महासंघ सर्लाही शाखाको संयोजकत्व तथा  न्युनतम पारिश्रमिक निर्धारण समितिको आयोजनामा सम्पन्न भएको कार्यक्रममा श्रमजीवी  पत्रकारहरुले नियुक्ति पत्र नपाउने,न्युनतम तलब नपाउने,संचारगृहले तोकेर दिने तलब समेत नियमित नपाउने लगायतका समस्याहरुको विषयमा छलफल गरिएको थियो।

   कार्यक्रममा समितिका सदस्य विमला पाण्डेले श्रमजीवी पत्रकार ऐनमा भएका व्यवस्था नेपालमा श्रमजीवी पत्रकारहरुको अवस्था लगायतका विषयमा जानकारी गराउनुभएको थियो।

   कार्यक्रममा उपस्थित पत्रकारहरले यस किसिमका गोष्ठी यसअघि पनि भइसकेको तर उपलब्धि भने नभएको गुनासो गरेका थिए।