🎤विशेष अन्तर्वार्ता....🖋️डा.सरोज कुमार यादव(जिल्ला उपसभापति)जिल्ला कार्यसमिति सर्लाही

 

'पार्टी भित्रै रहेर आफ्नै पार्टी विरुद्ध षड्यन्त्र रचि अन्तर्घात गर्ने ब्यक्तिहरु उपर समयमै कार्यवाही नगरिए आगामी दिनमा अपेक्षा गरे अनुसारको उपलब्धि पाउन पार्टीलाई मुस्किल पर्छ':-डा.सरोज कुमार यादव (उपसभापति), नेपाली काँग्रेस जिल्ला कार्यसमिति सर्लाही 

डा.सरोज कुमार यादव

     भर्खरै सम्पन्न स्थानीय तहको चुनावमा नेपाली काँग्रेसले सर्लाही जिल्लामा मात्र नभइ देशभरिनै राम्रो नतिजा ल्याउन सफल भएको छ। पार्टीले सर्लाही जिल्लाको २० वटै पालिकाहरुमा खडा गरेको आफ्ना उमेदवारहरु मध्येबाट अपेक्षा गरेको १५ जनामा १२ जनाले जित हासिल गरेको छ।बाँकी रहेका ३ जना उमेदवारले चुनाव जित्न सकेनन् ।अपेक्षा भने सबै उमेदवार जित्नु रहेको थियो।तर के कति कारणले यस्तो अवस्था आयो भन्ने विषयमा जानकारी लिन र पार्टीसँग सम्बन्धित अन्य थप कुराको जानकारी लिन नेपाली काँग्रेस जिल्ला कार्यसमिति सर्लाहीका उपसभापति डा.सरोज कुमार यादवसँग राष्ट्रिय लोकतन्त्र दैनिकका सम्पादक मनोज यादवले गर्नुभएको कुराकानीको अंश जस्ताको त्यस्तै प्रसुत गरिएको छ।

प्रश्न:-भर्खरै स्थानीय तहको चुनाव सम्पन्न भएको छ,तपाईंको पार्टी(नेपाली काँग्रेस)ले सर्लाही जिल्लामा मात्र नभइ मधेश प्रदेशसहित देशभरिनै पहिलो स्थान ल्याउन सफल भएको छ पार्टीको लागि यो एउटा ठुलो उपलब्धि हो,एउटा जिल्ला उपसभापतिको हैसियतले यस उपलब्धिलाई तपाईं कसरी हेर्नु हुन्छ ?

     @यसको सारा श्रेय म आम जनताहरुलाई दिन चाहन्छु।यसपटकको चुनावमा हामीले आम जनताको भावना र इच्छालाई समेट्ने काम गरेका छौ।यसै कारणले परिणाम सुखद र राम्रो आएको हो।आम जनताहरु कोरोना संकटको बेला र त्यो भन्दा पनि पहिला देखि केपी ओलीको सरकारको पालामा जुन बेला नेपालको संविधानलाई नै सखाप पार्ने कोशिस भएको थियो त्यो बेला हाम्रो पार्टीले आम जनताको भावनालाई बुझेर काम गरेको देखेर आम जनताको काँग्रेस प्रतिको विश्वास बढ्दै गएपछि आज आएर परिणाम सुखद र राम्रो आएको हो।

प्रश्न:-नेपाली काँग्रेस जिल्ला कार्यसमिति सर्लाहीले सभापति र उपसभापतिमा युवा नेता पाएको छ।तपाई एउटा युवा नेता त्योपनि उपसभापति जस्तो गरिमामय पदमा हुनुहुन्छ,सोही नाताले  पार्टीलाई अगाडी बढाउनमा तपाईंको भूमिका कस्तो रहेको छ ?

      @हाम्रो पार्टीको सर्लाही जिल्ला कार्यसमितिमा सभापति र उपसभापतिमा मात्र युवा छैनन् यस समितिमा सबैभन्दा धेरै युवाहरुकै बहुमत रहेको छ ।पछिल्लो समय देशभरिनै आम जनताको विश्वास युवा नेताहरु प्रति बढ्दै गएको छ।हामीले पनि प्रमाणित गर्न कोशस गरेका छौ।तर हामी युवा भएरै अरु भन्दा ठुलो भने हैनौ।हामीले पनि आफु भन्दा अग्रज नेताहरु सँग सल्लाह र सुझाव लिएर अगाडी बढिरहेका छौं ।आगामी दिनहरुमा पनि यसैगरी उहाँहरुको सल्लाह र सुझाव लिएर नै अगाडी बढ्ने छौं ।सर्लाहीमा नयाँ जिल्ला कार्यसमिति बनेको भर्खर दुई अढाई महिना भएको छ।हामीलाई अझ बढी सिक्नुपर्ने छ।जो ब्यक्ति तीनपटक  पार्टीको जिल्ला सभापति भएर काम गर्नुभएको छ,अहिले उहाँ संघीय सरकारको माननीय समेत हुनुहुन्छ ।उहाँकै दिशानिर्देशमा अगाडी बढ्दै गएकोले आज हाम्रो पार्टीले सर्लाही जिल्लामा राम्रो नतिजा ल्याउन सफल भएको छ।

प्रश्न:-तपाईंको पार्टीले सर्लाही जिल्लामा अपेक्षा गरेको भन्दा राम्रो सफलता पाएको छ।यस बारेमा तपाईंको ब्यक्तिगत विचार के छ ?

     @हो हामीले अपेक्षा गरे अनुरुप नै सफलता पाएका छौं ।तर जिल्लामा रहेका २० वटा स्थानीय तहहरु मध्येबाट हामीले  १५ वटामा सफलता पाउनुपर्ने थियो।तर १२ वटा स्थानीय तहमा मात्र उमेदवारहरु जिताउन पायौं ।यसको सबैभन्दा ठूलो कारण यसै पार्टी(काँग्रेस) बाट माननीय जस्तो पदमा बस्नु भएको र जिल्लाको पार्टी सभापति जस्तो गरिमामय पदमा पुगिसक्नु भएको ब्यक्तिहरुले पार्टी सँग गरेको अन्तर्घातले गर्दा स्थानीय तहको चुनावमा अपेक्षा गरे अनुसारको सिट जित्न नसकेका हौं ।हाम्रो कोसिस सबै स्थानीय तहमा जित हासिल गर्ने थियो।अहिले हामी जुन १२ वटा सिट जितेका छौं त्यसले पनि हामीलाई खुसी बनाएको छ तर कहीं न कहीं केही कमि भएको महसुस हामीहरुलाई लागेको छ।किनभने हाम्रो पार्टीको माननीय जस्तो ब्यक्तिले आफ्नै पार्टीबाट जितेर आफ्नै पार्टीलाई सखाप पार्न खोजेको देखिरहेका छौ।ती ब्यक्तिले आफ्नै पार्टीसँग अन्तर्घात नगरेको भए हामीले अझबढी स्थानमा जित हासिल गर्ने थियौं।

प्रश्न:-तपाई पार्टीको विधानलाई मानेर अघि बढ्ने ब्यक्ति हुनुहुन्छ,तर लालबन्दी नगरपालिकामा केही फरक देखियो कारण के हो ?

    @हामी पार्टीको विद्यानलाई मानेर अगाडी बढीरहेका छौं।जिल्लाको लालबन्दी नगरपालिकामा त्यस्तो केही फरक देखेनौं ।सोंचाइमा मात्र फरक देख्यौं ।हाम्रो पार्टीको उमेदवार गठबन्धन अनुसार कुनै दुईवटा पार्टीसँग मिलेर आफ्नो पार्टीको ब्यक्तिलाई उमेदवार बनाउन सक्ने थियो। लालबन्दीमा माओवादी र नेकपा समाजवादी पार्टी (माधव नेपाल )बीच गठबन्धन भइसकेको थियो ।सोही अनुसार हामीले हाम्रो तर्फबाट मेयर पदको लागि बासुदेव अधिकारीलाई उमेदवार बनायौं।बासुदेव अधिकारीलाई उमेदवार बनाई सकेपछि उता माओवादी पार्टीले ग्राउन्ड लेभलमा आफ्नो पार्टीको उमेदवारको मुल्यांकन गर्दा जित्न सक्ने अवस्था नदेखेपछि हाम्रो पार्टीको केन्द्रीय स्तरका नेताहरुलाई गठबन्धनको बहानामा दबाब दिन सुरु गर्यो।तर हामीले हाम्रो मान्छेलाई त्यहाँ  उमेदवार बनाइसकेकोले पछि हट्ने सम्भावना नरहेकोले माओवादी र समाजवादी पार्टीले पहिल्यै नै गठबन्धन गरिसकेको अवस्थामा पनि हामीले हाम्रो तर्फबाट उमेदवार उठाइसकेकोले हामी पछाडी हट्ने अवस्थामा थिएनौ र चुनावी मैदानमा डटी रह्यौं।

प्रश्न:-प्रश्न:-तपाईंको पार्टीले(काँग्रेस)सर्लाहीको निर्वाचन क्षेत्र न.१ र २ मा सबै सिट जितेको छ तर क्षेत्र न.३ र ४ को अवस्था किन फरक आयो त ?

    @स्थानीय तहको चुनावमा हाम्रो पार्टीको अवस्था राम्रो देखिएको छ। यही परिणामलाई प्रदेश र संघीय चुनावमा पनि कायम राख्न पार्टीसँग अन्तर्घात गर्ने ब्यक्तिलाई फेरीपनि अन्तर्घात गर्न नसकुन भनि त्यस्ता ब्यक्तिहरुलाई तत्कालै कार्यवाही हुनुपर्छ ।यदी त्यस्ता अन्तर्घाती ब्यक्तिहरुलाई पार्टीले कार्यवाही गरेन भने सर्लाहीको निर्वाचन क्षेत्र न.३ र ४ मा जुन अवस्था आएको छ त्यस्तै अवस्था अन्य क्षेत्रको पनि हुने छ।बेलैमा कार्यवाही गरिएन भने अन्तर्घात गर्ने ब्यक्तिको मनोबल अझ बढ्दै जाने  छ।भर्खरै बैशाख ३० गते सम्पन्न भएको स्थानीय तहको चुनावमा यसै पार्टीबाट माननीय बनेको ब्यक्ति,पुर्व जिल्ला सभापति,पुर्व उपसभापति,जिल्ला कार्यसमितिमा बसेका ब्यक्ति र पुर्व माननीयले पनि आफ्नै पार्टीको उमेदवारहरुको लागि नभइ अन्य विपक्षी पार्टीको उमेदवारहरुको लागि भोंट माग्दै हिडेको हामीले पाएका छौं ।उहाँहरु आफ्नै पार्टीको उमेदवारलाई हराउन जोडतोडका साथ लागेको हामीले पाएका छौं ।यस्तै अवस्था रहिरह्यो भने पार्टीले प्रदेश तथा संघीय चुनावमा अपेक्षा गरे अनुसारको मत पाउन मुस्किल हुने छ।जबसम्म उनीहरु उपर कार्यवाही हुँदैन तबसम्म अपेक्षा गरे अनुसारको उपलब्धि  पार्टीले पाउने छैन जस्तो मलाइ लागेको छ।त्यसैले केन्द्रलाई म यति मात्र भन्न चाहन्छु की जबसम्म अन्तर्घाती ब्यक्तिहरु उपर कार्यवाही गरेर ठेकान लगाइदैन एउटा कुहिएको आलुले जसरी सिंगै बोराको आलुलाई कुहाएर छाड्छ त्यसरीनै उनीहरुले पनि पार्टीको अवस्था यस्तै बनाइदिने छ।

प्रश्न:-अन्तमा केही भन्न चाहनुहुन्छ ?

    @अन्तमा म यतिमात्र भन्न चाहन्छु की स्थानीय तहमा पाएको सफलता जस्तै प्रदेश र संघीय चुनावमा पनि सफलता पाउन पार्टीसँग अन्तर्घात गर्ने जोसुकै ब्यक्तिलाई कार्यवाही हुनुपर्छ ।