मलंगवा-९ का बासिहरु वडाध्यक्ष चन्देश्वर रायले सुरु गरेको जनहितको कामको प्रशंसा गर्दै रायलाई वडाको जिम्मेवारी दिएर कुनै गल्ती नगरेको बताएका छन्

 

लोकतन्त्र समाचारदाता---

सर्लाही,जेठ १५

  सर्लाहीको सदरमुकाम  मलंगवा नगरपालिका वडा न-९ का बासिन्दाहरु नवनिर्वाचित वडाध्यक्ष चन्देश्वर रायले जनहितको लागि सुरु गरेको कामहरुलाई देखेर अब बल्ल विकासले गति लिन थालेको भन्दै सन्तुष्टि जनाएका छन ।
   विगतका दिनमा वडा न-९ मा नाममात्रको विकासका कामहरु  भएका थिए ।अब भने वडाध्यक्ष रायले पदभार ग्रहण गरे लगत्तै विपन्न वर्गका जनतालाई आर्थिकरुपमा सबल बनाउन सुरु गरेको कामलाई देखेर अबभने वडामा समग्ररुपमा विकास हुन्छ भन्नेमा आफुहरु ढुक्क रहेको स्थानीय वडाबासीहरुले बताएका छन् ।
    सोही क्रममा वडाध्यक्ष रायले कोरोना प्रभावित घरपरिवारको आय आर्जनमा वृद्धि होस् भनेर आफ्नो वडाको ७० घरपरिवारलाई प्रति घर २-२ वटाको दरले बाख्रा वितरण गर्नुभएको छ ।

    नगरप्रमुख नागेन्द्र प्रसाद यादवबाट सपथ ग्रहण गरे पश्चात् पदभार ग्रहण गरि वडाको जिम्मेवारी सम्हालेको २ दिन नबित्दै नवनिर्वाचित वडाध्यक्ष रायले श्रीमती कृष्णादेवी जनता माविको प्रांगणमा एक कार्यक्रमको आयोजना गरि  कोरोना संकटको समयमा रोजगारी गुमाएर आर्थिक अवस्था कमजोर भइसकेका पिडित वडाबासीहरुको पशुपालनको माध्यमबाट स्वरोजगार सिर्जना गर्ने उदेश्यले बाख्रा वितरण गरेर सहयोग पुर्‍याउनु भएको छ।
    बाख्रा वितरण कार्यक्रममा प्रमुख अतिथिको रुपमा सहभागी हुनुभएको नगर प्रमुख राय वडाध्यक्ष रायले गरेको सराहनीय कामको प्रसंसा गर्दै धन्यवाद दिनुभएको छ।