नवनिर्वाचित जनप्रतिनिधिहरुलाई सपथ ग्रहण गराइ धनकौल(प) गाउँपालिका अध्यक्षले गरे पदभार ग्रहण

मनोज यादव---

सर्लाही,जेठ ११

    सर्लाहीको धनकौल(प) गाउँपालिकाका नवनिर्वाचित गापा अध्यक्ष राम आश्रय साहले आज(बुधबार)विधिवत् रुपमा पदभार ग्रहण गरेका छन् ।साहले यस गाउँपालिका अन्तर्गतका ७ वटा वडामा नवनिर्वाचित वडाअध्यक्ष र सदस्यहरुलाई पद तथा गोपनियताको सपथ ग्रहण गराइ आजैबाट गापा अध्यक्षको पद सम्हालेका हुन।

     पद सम्हाल्दै उनले आर्थिक वर्ष २०७९/०८० को पहिलो गाउँसभाको बैठकमा निर्णायार्थ पेश गरि कार्यान्वयनका लागि चुनावी प्रचारप्रसारको बेला जनताबाट प्राप्त पुष्टपोषणको आधारमा सबैभन्दा सम्वेसनशिल क्षेत्रलाई प्राथमिकतामा राखेेर समानता र समतामूलक पहुँच हुनेगरि योजना तथा कार्यक्रमहरु गर्ने घोषणा गरेका छन् ।

  गापा अध्यक्ष साहले गाउँपालिकाको तर्फबाट  सम्पूर्ण सेवा सुविधा युक्त भएको एम्बुलेन्स खरिद गरि जनताहरुलाई प्रभावकारी सेवा प्रवाह गर्ने ,सबै गर्भवती तथा सुत्केरी आमाहरुलाई सर्लाही जिल्लाभरी निशुल्क सेवा प्रदान गर्ने,सामुदायिक विद्यालयहरुमा रिक्त रहेका दरबन्दीमा तुरुन्त शिक्षक बहालीको प्रक्रिया अगाडी बढाउने तथा विद्यार्थी संख्या धेरै भएका तर दरबन्दी नभएका विद्यालयहरुमा यस गाउँपालिकाबाट विद्यार्थीको अनुपातमा स्वयंसेवक शिक्षकहरु परिचालन गरि गुणस्तरीय शिक्षा प्रदान गर्ने र शिक्षा तथा स्वास्थ्य क्षेत्रका भौतिक संरचनाहरु निर्माण गर्ने निर्णय गरेका छन् ।

   गत सोमबार सदरमुकाम मलंगवा स्थित जिल्ला समन्वय समितिको कार्यालयमा आयोजना भएको सपथ ग्रहण कार्यक्रममा जिल्लाका अन्य स्थानीय तहका नवनिर्वाचित पालिका प्रमुखहरु सँगै सपथ ग्रहण गरिसक्नु भएको साहले आज(बुधबार)उपाध्यक्ष , वडाअध्यक्ष तथा सदस्यहरुलाई सामुहिक रुपमा पद तथा गोपनियताको सपथ ग्रहण गराउनुभएको छ।

   दिउँसो २ बजेको लागि तय गरिएको कार्यक्रम केही कारणवस्  निर्धारित समयभन्दा २ घण्टा ढिलो गरि सुरु भएपनि शान्तिपुर्वक कार्यक्रम सम्पन्न भएको थियो।

   यसै अवसरमा कार्यक्रमको अध्यक्षता समेत गरेका  नवनिर्वाचित अध्यक्ष साहले प्रमुख अतिथि मधेश प्रदेशका महिला, बालबालिका युवा तथा खेलकुद मन्त्री विरेन्द्र प्रसाद सिंह र धनकौल गापाका निर्वाचन अधिकृत शिवदत्त बराललाई उपहारस्वरुप  फ्रेमिङ गरिएको चाँदीद्वारा निर्मित जानकी मन्दिरको तस्बिर प्रदान गरेका थिए।