सर्लाहीको मलंगवामा नि:शुल्क आँखा शिविर : २ हजार भन्दाबढी ब्यक्तिहरु लाभान्वित ,५ सयभन्दा बढीको नि:शुल्क शल्यक्रिया

मनोज यादव----

सर्लाही,आश्विन १४

     सर्लाहीमा  सम्पन्न ८ दिने निशुल्क आँखा शल्यचिकित्सा शिविरमा २ हजार भन्दाबढी  आँखाका बिरामीले सेवा लिएका छन् । सदरमुकाम मलंगवा स्थित सर्लाही आँखा केन्द्रको  आयोजना  तथा  सगरमाथा चौधरी आँखा अस्पताल लहानको प्राविधिक सहयोगमा  संचालन गरिएको उक्त नि:शुल्क आँखा  शिविरमा २ हजार २ सय ९३ जना आँखका बिरामीहरुले लाभ लिएका छन् । 

  शिविरमा  मोतियाबिन्दुका बिरामीहरुको शल्यक्रिया समेत गरिएको छ।केन्द्रका अनुसार जिल्लाको भाँडसर,चक्रघट्टा,पर्सा,कौडेना,

सहोडवा,बलरा,लालबन्दी लगायतका स्थानहरुमा संचालन गरिएका आँखा जाँच शिविर र उक्त शिविरमा फेला परेका ६ सय १३ जना मोतियाबिन्दुका बिरामीहरु मध्येबाट छनौट भएका ५ सय ५६ जनालाई मलंगवा स्थित सर्लाही  आँखा केन्द्रमा ल्याएर शल्यक्रिया गरिएको थियो।

    यही असोज ६ गतेदेखि सञ्चालन गरिएको निशुल्क आँखा जाँच तथा शल्यक्रिया  शिविरको शुक्रवार मलंगवा स्थित केन्द्रमा नेपाल नेत्र ज्योती संघ सर्लाहीका अध्यक्ष अमरनाथ जयसवालको अध्यक्षतामा एक कार्यक्रमको आयोजना गरि समापन गरिएको छ। 

     लगातार  आठ दिनसम्म चलेको उक्त शिविरलाई सफलता पुर्वक संचालन गर्न सहयोग पुर्याएका मलंगवा नगरपालिका वडा न-३ का वडाध्यक्ष प्रमोद राय,वडा न-८ का वडाध्यक्ष मुकेश जयसवाल,वडा न-९ का वडाध्यक्ष चन्देश्वर यादव लगायत आँखा जाँच तथा शल्यक्रियामा संलग्न चौधरी आँखा अस्पताल लहानका चिकित्सकहरुको टोली तथा अन्य केही समाजसेवीहरुलाई नेपाल नेत्र ज्योति संघ सर्लाहीका अध्यक्ष जयसवाले मधेशको पहिचान र शानको रुपमा रहेको गमछा ओढाएर मायाको चिनोसहित सम्मानित गरिएको केन्द्रका प्रमुख निराजन साहले साहले जानकारी गराएको छ। 

    कोरोना कालमा देशभरसहित सर्लाही जिल्लामा पनि लगाइएको लकडाउन पछि आयोजना भएको यस शिविर मार्फत यति ठुलो संख्यामा आँखाको रोगीहरुको  जाँच भएको यो पहिलोपटक रहेको आयोजक संस्थाले जनाएको छ।

    आफ्नै जिल्लामा नि:शुल्क रुपमा आँखाको जाँच तथा मोतियाबिन्दुको शल्यक्रिया गराउन पाएका बिरामीहरु  शल्यक्रिया पश्चात् खुसी देखिएका थिए।