सर्लाहीका होटल व्यवसायीहरु द्वारा भारतीय पर्यटक भित्रिने दशगजा क्षेत्रको सरसफाइ गरि पर्यटन वर्ष २०२२ को सुभारम्भ

 

मनोज यादव---

सर्लाही,आश्विन ९

    सर्लाहीका होटल व्यवसायीहरु "घुमौ मधेश,बुझौ प्रदेश "भन्ने नाराका साथ पर्यटन वर्ष २०२२ मनाउन लागेका छन् ।

    सोही क्रममा होटल तथा पर्यटन व्यवसायी संघ सर्लाहीले आज (आइतवार)बिहान भारतीय पर्यटक भित्रिने प्रवेशद्वार नेपाल भारत सिमा अन्तर्गत पर्ने सदरमुकाम मलंगवा स्थित दशगजा क्षेत्रको सरसफाइ गरेको छ।  संघले जिल्ला समन्वय समिति सर्लाहीका सभापति कौशल किशोर सिंहको अगुवाइमा भारतीय पर्यटकहरुको स्वागतका लागि  नेपाल भारत सिमा छुट्याउने जंगे पिलरदेखि जिल्ला भन्सार कार्यालयसम्मको सडकको सरसफाइ गरेका छन् ।

    गएको २ वर्ष अगाडी भिजिट नेपाल २०२० मनाउन भनि ठुलो लगानी गरेर तयारी अवस्थामा रहेका यहाँका होटल तथा पर्यटन व्यवसायीहरुलाई कोरोना भाइरसको संक्रमण तथा लकडाउनका कारण तय गरिएका सम्पूर्ण कार्यक्रमहरु स्थगित गर्नुपरेको थियो।जसले गर्दा उनीहरूलाई ठुलो आर्थिक मार सहनुपरेको थियो। तर यसवर्ष पहिलाको जस्तो अवस्था नरहेकोले मधेश प्रदेश अन्तर्गतआठ वटै जिल्लाका होटल तथा पर्यटन व्यवसायीहरु "घुमौ मधेश,बुझौ प्रदेश "भन्ने नारा दिएर यसवर्षको पर्यटन वर्ष २०२२ मनाउन लागेको होटल तथा पर्यटन व्यवसायी महासंघका कोषाध्यक्ष बैकुण्ठ सापकोटाले जानकारी दिए।

   सरसफाइ कार्यक्रम पश्चात्  संघले पत्रकार सम्मेलनको आयोजना गरि नेपाल तथा भारत दुवै देशका संचारकर्मीहरुलाई  मधेश प्रदेशको आठ वटै जिल्लाहरुमा एकैसाथ मनाउन लागेको पर्यटन वर्ष २०२२ र तय गरिएका कार्यक्रमहरुको बारेमा जानकारी गराएका थिए। जस अनुसार  असोज ११ गते बिहान मलंगवा नगर क्षेत्रमा प्रभात फेरी गरि नेपाल पर्यटन वर्ष २०२२ को लोगो सहितको बैलुन उडाउने र मलंगवा स्थित भन्सार कार्यालय भएर नेपाल प्रवेश गर्ने भारतीय पर्यटकहरुलाई खाँदा र टीका लगाएर स्वागत गर्ने कार्यक्रम रहेको अध्यक्ष हिराकाजी योन्जनले संचारकर्मीहरुलाई जानकारी दिए।

    मधेस प्रदेश अन्तर्गतका आठ वटै जिल्लाको भ्रमण गर्न आउने पर्यटकलाई  होटलहरुमा खानामा १५ प्रतिशत  र आवासमा २५ प्रतिशत छुटको समेत व्यवस्था गरेको संघले जनाएको छ।

    कोरोना तथा लकडाउनका कारण नेपाल घुम्न आउने पर्यटकहरुको संख्यामा आएको कमिका कारण  लगभग धारासायी नै भइसकेको होटल तथा पर्यटन व्यवसायलाई यसवर्षको पर्यटन वर्षले केही केही रहत प्रदान गर्ने   जिल्ला समन्वय समिति सर्लाहीका प्रमुख कौशल किशोर सिंहले बताए ।