मलंगवाको जिविस चौकमा ट्राफिक प्रहरीले ल्याए चाडवाड लक्षित यात्रु सहायता कक्ष

लोकतन्त्र समाचारदाता---

सर्लाही,आश्विन १२

सर्लाहीको सदरमुकाम मलंगवा नगरपालिका वडा न-१० स्थित जिविस चौकमा दशै,तिहार र छठ पर्वलाई लक्षित गरेर  नागरिक यात्रु सहायता कक्षको सुरुवात गरिएको छ । यात्रुको सहजताका लागि ट्राफिक प्रहरी कार्यालय मलंगवाले यात्रु सहायता कक्ष संचालनमा ल्याइएको हो ।

    चाडपर्वको बेला हुन सक्ने समस्यालाई मध्यनजर गरी यात्रु सहायता कक्षको स्थापना गरिएको ट्राफिक प्रहरी कार्यालय मलंगवाका इन्चार्ज अरुण पाण्डेले बताउनुभयो ।नागरिकहरुको  सहयोग र सहजीकरणका लागि जिल्लाको अन्य स्थानहरुमा पनि यात्रु सहायता कक्ष स्थापना भएको इन्चार्ज पाण्डेले  बताउनुभयो ।

    ट्राफिक र प्रहरीले मात्रै सहयोग गरेर यात्रुलाई सहज नहुने हुँदा सवारी धनी चालक र यातायात कम्पनीले पनि पर्वका बेला सहजीकरण गर्नुपर्ने उहाँले बताउनुभयो । उहाँले पर्वका बेला हुनसक्ने दुर्घटनाका बारेमा सचेत हुन र सबैले ट्राफिक नियमको पालना गरेमा मात्रै सहज तरिकाले पर्व मनाउने सकिने विषयमा गम्भीर भएर यात्रा गर्न र सवारी चलाउन पर्नेमा जोड दिनुभयो।

   यस्तै नेपाल पत्रकार महासंघ सर्लाहीका पुर्व उपाध्यक्ष संचारकर्मी बख्तियार अलीले पर्वका बेला सर्वसाधारण नागरिकहरु र यात्रु ठगिने र विभिन्न सास्ती खेप्नु पर्ने अवस्थालाई मध्यनजर गरेर स्थापना गरिएको  सहायता कक्षबाट सहयोग लिन सबैलाई आग्रह गर्नुभएको छ।

    चाडवाडको समयमा सवारीमा बढी भाडा लिने, सामग्री हराउने, गन्तव्यमा पुग्ने सवारीको ज्ञान नहुने जस्ता समस्यामा परेका यात्रुले सहायता कक्षबाट सेवा लिन पाउनेछन् ।