कौडेनामा शवदाह स्थलको बिवाद समाधान

 

सर्लाही ,भदौ २८
सर्लाहीको कौडेना गाउँपालिका वडा न-५ छपकैयामा शवदाह स्थलको स्वामित्वको विषयलाई लिएर दुई समुदाय बिच चलिरहेको बिवाद  तत्कालका लागि समाधान गरिएको छ ।
    शवदाह स्थलको जग्गाको  विषयलाई लिएर विगत केही दिनदेखि त्यहाँका हिन्दु र मुस्लिम समुदाय बिच बिवाद चर्किएको थियो । सोही क्रममा गत बिहिवार दुबै समुदाय बिच  झडप समेत भएको थियो ।उक्त झडपमा दुई प्रहरी सहित ८ जना घाईते भएका थिए भने शुक्रवार फेरी  झडपको स्थिति सिर्जना भएको थियो । गाउँको स्थिति बिग्रन थालेपछि सनिवार सदरमुकाम  मलंगवाबाट ४ जना अमिन पठाएर  दुबै समुदायका अगुवा , वडाध्यक्ष रामबाबु यादव लगायतलाई  राखेर जग्गाको नाप गरि दोबारा  विवाद नगर्ने सहमति गराएर समस्याको समाधान गरेको जिल्ला समन्वय समितिका प्रमुख मेथुर चौधरीले बताए।
    अमिनले छुट्याएको १० कठ्ठा जग्गामा मुस्लिम समुदायले कब्रस्थानको रुपमा प्रयोग गर्ने र हिन्दु समुदायले ५ कठ्ठा भन्दा केही बढी जग्गा घाटको रुपमा प्रयोग गर्ने सहमति भएको जिसस प्रमुख चौधरीले जानकारी दिए ।