सर्लाहीको बागमतीमा झुण्डिएर एक नवविवाहिता महिलाको शंकास्पद मृत्यु

 

लोकतन्त्र समाचारदाता----

सर्लाही ,असोज १३

    सर्लाहीमा  झुण्डिएर एक नवविवाहित महिलाको मृत्यु भएको छ। जिल्लाको बागमती नगरपालिका वडा न-९ शंकरपुर  बस्ने संजय चौधरीकी  श्रीमती २० वर्षीया प्रियंका चौधरीको सोमबार दिउँसो  झुण्डिएर मृत्यु भएकोे जिल्ला प्रहरी कार्यालय सर्लाहीले जनाएको छ।

    आफ्नै घरमा  पासो लगाई झुण्डिएको अवस्थामा प्रियंकाको मृत शरिर फेला परेको प्रहरीले जनाएको छ। सोमबार दिउँसो प्रियंकालाई घरको आफ्नै  सुत्ने कोठामा झुण्डिएको अवस्थामा देखेपछि सासुले छिमेकीको सहयोगमा डोरी काटेर मृत शरिर ओछ्यानमा राखेर प्रहरीलाई खवर गरेका थिए । प्रहरी टोली घटना स्थलमा पुगेर घटना स्थलको  मुचुल्का उठाएर बेलुका ३ बजे मृतकको शव पोष्टमार्टमकालागि जिल्ला अस्पताल मलंगवामा ल्याएका थिए । पोष्टमार्टमपछि प्रियंकाको शव  श्रीमानलाई बुझाइएको प्रहरीले जनाएको छ 

    तर उता महोत्तरीको औरही नगरपालिका वडा न-१ स्थित माइती पक्षले भने प्रियंकाले आत्महत्या नगरेको बताएका छन् ।मृतक र संजयको हालै तीन महिना अगाडी असाढ १४ गते विधिपुर्वक  विवाह भएको थियो ।विवाह भएको केहीदिनमै दुबैजना बीचको सम्बन्ध नराम्रो रहेको र प्रियंकालाई संजयले पटकपटक शारिरिक र मानसिक यातना समेत दिंदै आएको मृतकका काका श्रवण चौधरीले बताए।छिमेकीका अनुसार घटनाको दिन मृतकका ससुरा सुरेन्द्र चौधरी फलफुल बेच्न बजार गएको र श्रीमान आफ्नो एकजना मुस्लिम समुदायको साथीको विवाहमा गएको र घरमा सासू र उनी मात्र रहेका थिए ।तर माइती पक्षले घटना स्थलमा प्रहरी पुग्नु भन्दा पहिल्यै डोरी काटेर शवलाई ओछ्यानमा राखेको र घटनाको बारेमा समेत आफुहरुले अरुनै ब्यक्ति मार्फत जानकारी पाएकोले आत्महत्या नभइ हत्या गरेर डोरीमा झुण्ड्याएको आरोप लगाएका छन् ।माइतीबाट आफन्तहरु आउन नपाउँदै आननफाननमा शवको पोष्टमार्टम गरेर पठाएकोले घटना शंकास्पद रहेको मृतका काका श्रवण चौधरीले भने ।घटनाको छानबिन गरी दोषीहरुलाई सजाय दिन उनीहरुले माग गरेका छन् ।

    मृतको शव सोही दिन पोष्टमार्टम गरि श्रीमानको जिम्मा लगाएर घटनाको छानबिन सुरु भइसकेको जिल्ला प्रहरी कार्यालय मलंगवाले जनाएको छ ।