*
खेतबारीको काममा सरकारी गाडिको प्रयोग*
मनोज यादव----
सर्लाही ,असोज १२
सर्लाहीको स्थानीय तहमा सरकारी गाडीको चरम दुरूपयोग भइरहेको छ । गाउँ गाउँमा सिंहदरबार भन्ने नाराका साथ संघियताअनुरूप व्यवस्था गरिएको स्थानीय तहका जनप्रतिनिधिदेखि कर्मचारीहरुले सरकारी गाडीको चरम दुरूपयोग गरिरहेको पाइएको छ ।
स्थानीय जनताको समस्या समाधानका लागि उनीहरुको घर दैलोमा पुग्न र विकास निर्माणको काममा सहज भएर लाग्न जिल्लाभरका पालिकाहरुले आफ्ना जनप्रतिनिधि तथा कर्मचारीहरुको लागि ठूलो धनराशी खर्च गरेर लाखौंको सवारीसाधन किनेका छन् । सुरुका दिनमा स्थानीय तहले प्राथमिकताका साथ गाडी तथा मोटरसाइकल खरिद गर्न थालेपछि जिल्लामा त्यसको व्यापक आलोचना समेत भएको थियो ।लाखौंको सुविधा सम्पन्न गाडी तथा त्यसमा प्रयोग हुने इन्धन, मोबिल तथा मर्मत खर्च स्थानीय तहले व्यहोर्दै आएका छन् ।विकास निर्माणको लागि भनि आएको बजेट सवारीसाधनको रखरखावमा खर्च भएको भन्दै त्यसको व्यापक विरोध समेत भएको थियो ।
स्थानीय तहले एकातिर सवारीसाधनको रखरखावमा वार्षिक लाखौं खर्च गर्दै आएका छन् भने अर्कोतर्फ ती सरकारी गाडीहरूको निजी प्रयोग पनि बढ्दो छ । जसका कारण व्यक्तिगत प्रयोजनका लागि सरकारी सम्पत्तिको प्रयोग गरी दुरूपयोग बढेको छ ।जिल्लाका अधिकांश स्थानीय तहका जनप्रतिनिधि तथा कर्मचारीहरुले सरकारी सुविधाको रुपमा पाएको मोटरसाइकल घरको कामदेखि खेरबारीको काममा प्रयोग गर्ने गरेका छन् ।वडाध्यक्षले पाएको मोटरसाइकल उनीहरुका छोरा ,भाइ ,भतिजा र सालोले गुडाइरहेको देख्न पाइन्छ ।मोटरसाइकलमा प्रयोग हुने इन्धन लगायतका सुविधा स्थानीय तहबाट लिँदै आएका वडाध्यक्षहरु जनताको काम नगरी त्यसको प्रयोग भने आफ्नो घरको र ब्यक्तिगत काममा प्रयोग गर्दै आएको स्थानीयहरुले बताएका छन् ।
यसरी सरकारी सम्पत्तिको दुरुपयोग गर्नेहरुलाई तत्कालै कार्यवाहीको दायरामा ल्याउन सरोकारवाला निकायको ध्यान जान जरुरी रहेको मानवअधिकारबादी मुकेश मिश्रले भने ।
No comments:
Post a Comment