कर्मचारीहरुमा कोरोना संक्रमण देखिए पछि मलंगवाको नापी कार्यालय एक हप्ताको लागि ‘सिल’

 

सर्लाही,भदौ ३१
   सर्लाहीको सदरमुकाम मलंगवा स्थित नापी कार्यालय एक हप्ताको लागि सिल गरिएको छ । एकैसाथ पाँच जना कर्मचारीहरुमा कोरोना भाइरस पोजेटिभ देखिएपछि नापी कार्यालयलाई एक हप्ताको लागि  ‘सिल’ गरिएको हो ।
    जिल्ला कोरोना संकट व्यवस्थापन केन्द्र (डी.सी.सी.एम.सी) को  बैठकले सात दिनका लागि नापी कार्यालय मलंगवा बन्द गर्ने निर्णय गरेको  प्रमुख जिल्ला अधिकारी सुरेन्द्र पौडेलले जानकारी दिए ।उक्त कार्यालयका एक जना अमिन, एक जना सर्वेक्षक र तीन जना कार्यालय सहयोगीहरुमा कोरोना भाईरस पोजिटिभ पाइएको प्रजिअ पौडेलले बताउनुभयो  ।परिक्षणको लागि  स्वाब दिइसके पनि  कर्मचारीहरुले  भीडभाडमै बसेर सेवा प्रवाह गरेकाले त्यस बिचमा नापी कार्यालय नजिकै रहेका मालपोत र भूमि सुधार कार्यालयमा  सेवा लिन आएका सेवाग्राही तथा कर्मचारीहरु पनि संक्रमित भएको हुन सक्ने भएकोले  सावधानी अपनाउन  कार्यालय प्रमुख एवं  नापी अधिकृत कृष्णदेव सिहले आग्रह गरेका छन् ।
    कर्मचारीहरुको  रिपोर्ट एकदिन अघिनै आएको भएपनि मलंगवा  नगरपालिकाका स्वास्थ्यकर्मीले बेलैमा जानकारी नदिँदा संक्रमित हुँदापनि उनीहरुले कार्यालयको काम गरेको  नापी अधिकृत सिंहले बताए । 
    समुदाय स्तरमा संक्रमण पाइएपछि एक महिना बन्द गरिएका सर्लाहीका सरकारी कार्यालयहरु एक सातादेखि खुलेका छन् ।