सर्लाही , भदाै २७
सर्लाहीको बागमती नगरपालिकामा भएको आर्थिक अनियमितता तथा मेयर भरत थापाको सम्पत्ति छानबिन हुनुपर्ने लगायतका मागहरु राख्दै बागमती नगरपालिकाको कार्यालय परिसरमा गत बुधबारदेखि आमरण अनसमा बसेका एक परिवारले शुक्रबार साँझ अनसन तोडेको छ । शुक्रबार अपरान्ह प्रमुख जिल्ला अधिकारी सुरेन्द्र पौडेल सहित जिल्ला स्थित सुरक्षा निकायका प्रमुख, बागमती नगरपालिकाका मेयर भरतकुमार थापा र अनसनरत पक्षबीच भएको लामो छलफल पश्चात अनसन तोडिएको जिल्ला प्रशासन कार्यालयले जनाएको छ ।
विभिन्न ७ बुँदे माग राख्दै बुधबार बिहान १० बजेबाट
गत वर्ष प्रहरी कारवाहीमा मारिएका बागमती नगरपालिका–२, धरहरा निवासी विप्लव समूहका तत्कालिन जिल्ला इन्चार्ज कुमार पौडेलका परिवारका तीन जना सदस्यले नगरपालिकाको कार्यालय परिसरमा आमरण अनसन सुरु गरेका थिए । शुक्रबार साँझ अनसन तोडेका हुन् । कुमार पौडेलकी ७२ वर्षिया आमा दुर्गादेवी पौडेल, पत्नी धनकुमारी खड्का पौडेल र भाई हरिकृष्ण पौडेलले सम्पत्ति शुद्धिकरण आयोगबाट नगर प्रमुख भरत कुमार थापाको सम्पत्ति छानबिन हुनुपर्ने, नगरपालिकामा विकास निर्माणको कामका शिलशिलामा अनियमितता भएकाले अख्तियार दुरुपयोग अनुसन्धान आयोगबाट छानबिन हुनुपर्ने, बागमती नदीको अवैध उत्खनन रोकेर दोषीलाई कारवाही गर्नुपर्ने, बुढी बागमतीमा पोखरी खन्दा निस्किएको गिट्टी बालुवा बिक्रीबाट भएको आम्दानीको हरहिसाब पारदर्शी गर्नुपर्ने लगायतका ७ बुँदे मागहरु राखेर अनसनमा बसेका थिए ।मागका सम्वन्धमा मौखिक र लिखित रुपमा पटक–पटक जानकारी गराउँदा पनि सुनुवाई नभएपछि बाध्य भएर आमरण अनसनमा बस्नु परेको पौडेलका भाई हरिकृष्ण पौडेलले बताए ।
मेयर थापाले पूरा गर्न सक्ने मागको अबिलम्ब सम्बोधन गर्ने र माथिल्लो निकायबाट पूरा हुनुपर्ने मागको सम्बन्धमा आवश्यक कार्यवाहीका लागि तत्काल लेखिपठाउने सहमति भएको प्रजिअ पौडेलले जानकारी दिनुभयो । दुवै पक्ष बिच सहमति भएपछि अनसनमा बसेका परिवारलाई पानी खुवाएर अनसन तोडाईएको छ प्रजिअ पौडेलले जानकारी दिनुभयो ।
मेयर थापाले आफू विरुद्ध सम्पति शुद्धिकरण, अख्तियार लगायतमा छानविन गराउन र दोषि देखिए कार्बाहीको भागिदार हुन तयार रहेको बताएका छन् । त्यस्तै नगरपालिका स्तरमा पूरा हुने मागका सम्बोधन गर्न जतिखेर पनि आफू तयार रहेको मेयर थापाले भने ।
No comments:
Post a Comment