छिनछिनमा बत्ती जाँदा उपभोक्ताहरु हैरान

 

लोकतन्त्र समाचारदाता---

सर्लाही ,भदौ ३१

   केही दिनदेखि सर्लाहीभरी  विद्युत सेवा अनियमित भएको  छ । छिनछिनमा बत्ती कटौती भइरहँदा उपभोक्ताहरु  हैरान भएका छन् ।

    केही दिनदेखि भइरहेको वर्षाका कारण पटकपटक  विद्युत प्रवाहमा समस्या  देखिने गरेको जिल्ला स्थित नेपाल विद्युत प्राधिकरणको वितरण केन्द्रहरुले बताएको छ ।मलंगवामा केही समयसम्मको लागि बत्ती गएपनि ग्रामीण क्षेत्रका कतिपय ठाउँहरुमा घण्टौंसम्म पनि विद्युत सेवा ठप्प हुने गरेको स्थानीय उपभोक्ताहरुले  बताएका छन् ।

पानी पर्न सुरु हुनासाथ विद्युत प्रवाहमा समस्या देखिने गरेको छ उपभोक्ताहरुले बताए । दैनिक रुपमा विद्युत सेवा अनियमित हुँदा बिजुलीबाट हुने सम्पूर्ण  कामहरु प्रभावित बनेका छन् ।

     प्राधिकरणको मलंगवा वितरण केन्द्रले भने केन्द्रीय प्रशारण लाइनमा आएको खराबीले गर्दा विद्युत अनियमित भएको जनाएको छ । केन्द्रीय प्रशारण लाइनबाट नै एक ठाउँबाट अर्को ठाउँमा लाईन दिने क्रममा लोड तलमाथि हुँदा यस्तो समस्या आएको केन्द्रले बताए । कुनै किसिमको फल्ट आएको खण्डमा तुरुन्त मर्मतका लागि आफुहरु तयारी अवस्थामा रहेको  प्राधिकरणका प्राविधिकहरुले बताएका छन् ।दिनभर विभिन्न  विद्युतीय उपकरणहरु चल्दा  लोड थपिने साथै  पुराना तार  तथा सव–स्टेशनमा पानी परेको बेला यस्तो समस्या आउने गरेको  प्राविधिकहरुले बताएका छन् ।