सर्लाहीका कोरोना संक्रमितहरु आइसोलेसन छाडेर खुलेआम रुपमा बजार घुम्न थालेपछि संक्रमणको जोखिम बढ्यो

सर्लाही, भदौ ६ 

    होम आइसोलेसनमा बसेका  कोरोना भाईरस (कोभिंड १९ ) बाट संक्रमित ब्यक्तिहरु  आइसोलेसन छाडेर बजारमा खुलेआम घुम्न  थालेपछि सर्लाही जिल्लामा कोरोना संक्रमणको जोखिम बढेको छ  । 

     प्रदेश सरकार तथा स्थानीय निकायले निर्माण गरेको आईसोलेसनमा रहेका संक्रमितको भन्दा होम आईसोलेसनमा रहेका  संक्रमितहरुको संख्या झन्डै दोब्बर रहेको छ । प्रायः  जसो होम आईसोलेसनमा रहेका अधिकांश  संक्रमितहरु हुने खाने र पहुँचवालाहरु रहेका छन । प्रमुख जिल्ला अधिकारी सुरेन्द्र पौडेले  दिएको जानकारी अनुसार सर्लाहीमा होम आईसोलेसनमा २ सय ८४ जना रहेका छन् । उनीहरू आइसोलेसनमा बस्दा अपनाउनु पर्ने सबै नियमहरुलाई तोड्दै निर्धक्कका साथ खुलेआम रुपमा  बिहान मोर्निङ्ग वाक तथा चिया खाजा  खान बजार निस्कन थालेपछि जिल्लामा  संक्रमितको संख्या बढदै गएको छ । प्रजिअ पौडेलले पनि यसकुरालाई स्विकार्नु हुँदै आफुले समेत  एकजना संक्रमित ब्यक्तिलाई आइसोलेसन छाडेर  बाहिर घुमेको भेटाएपछि निजलाई नियन्त्रणमा लिएर  ग्रुप आईसोलेसनमा पठाएको बताउनुभयो ।

    सर्लाहीको बरहथवा नगरपालिकामा ५२ जना कोरोना संक्रमितहरु फेला परेपछि १३ जनालाई ग्रुप आईसोलेसनमा राखिएको छ, भने ३९ जना होम आईसोलेसनमा बसेका छन् । होम आईसोलेसनमा बसेका ब्यक्तिहरु बाहिर घुमेको पाइएको छ । बरहथवा नगरपालिकाका मेयर देवानन्द महतोले  यो चिन्ताको विषय भएको बताउँदै यसको समाधानका लागि  जिल्ला स्तरमा बैठक बसि एउटा ठुलो आईसोलेसनको निर्माण गर्नुपर्ने बताए । 

     सरकारले कोरोना संक्रमण फैलिन नदिन लकडाउन लगाए पनि यसरी  संक्रमितहरु खुलेयाम रुपमा बाहिर घुम्न  थालेपछि लकडाउनको औचित्य समाप्त भएको सामाजिक अभियन्ताहरु बताउँछन् । यस प्रति नेपाल सरकारको तत्कालै ध्यानाकर्षण भएन भने यसको परिणाम घातक हुने समेत उनीहरुले चेतावनी दिएका छन् ।