पूर्व मन्त्री सोनेलाल राय यादवको खुटौनामा ससम्मान दाहसंस्कार गरियो

लोकतन्त्र समाचारदाता---

सर्लाही , भदौ ९

     पूर्व सहायक गृह राज्यमन्त्री सोनेलाल राय यादवको मंगलबार गृह जिल्ला सर्लाहीको मलंगवा नगरपालिका वडा न-५ स्थित खुटौनामा  ससम्मान दाहसंस्कार गरिएको छ । उहाँको राष्ट्रिय प्रजातन्त्र पार्टी (राप्रपा नेपाल )को झण्डा ओढाएर प्रहरीको सलामीका साथ ससम्मान दाहसंस्कार गरिएको छ ।उहाँको दाहसंस्कारमा विभिन्न क्षेत्र सँग आबद्ध भद्रभलादमी तथा विभिन्न ओहोदाका व्यक्तिहरुको उपस्थिति रहेको थियो ।

     मन्त्री यादवको ७२ वर्षको उमेरमा सोमबार काठमाडौ स्थित वीर अस्पतालमा उपचारकै क्रममा पौने तीन बजे निधन भएको थियो । उहाँ ६३ दिनदेखि वीर अस्पतालको आईसियुमा उपचारार्थ रहेको  उनका कान्छा छोरा लालबाबु   यादवले जानकारी दिए ।

   यादवकी श्रीमती कैलाशदेवी यादव सहित दुई छोरा रामगोपाल राय यादव र लालबाबु राय यादव छन् भने एक छोरी अनिता यादव छिन् ।

    राजाको प्रत्यक्ष शासन कालमा यादव सहायक गृह  राज्यमन्त्री हुनुहुन्थ्यो । उहाँ  २०२८ सालदेखि गाउँ प्रक अधिकारी, मजदुर संगठनको केन्द्रिय कोषाध्यक्ष र डा. प्रकाशचन्द्र लोहनी नेतृत्वको तत्कालिन राप्रपा संयुक्तका प्रदेश नम्बर २ का प्रमुख  थिए ।