नेपाल प्रहरी र सशस्त्र प्रहरीको निगरानीमा सर्लाहीको सिमानाकाहरुमा कडाइ

 

लोकतन्त्र समाचारदाता---

सर्लाही ,भदौ ३
     सर्लाही जिल्ला अन्तर्गत नेपाल  भारत सीमानाकाबाट लुकिछिपी नेपाल भित्रीनेको संख्या बढेपछि लुकिछिपी नेपाल प्रवेश हुन नदिन स्थानीय प्रशासनले नेपाल प्रहरी र सशस्त्र प्रहरी मार्फत  सीमा क्षेत्रको निगरानीमा थप कडाई गरेको छ ।
    बिश्वब्यापी महामारीको  रुपमा फैलिएको  कोरोना भाइरस (कोबिड–१९ )को संक्रमणबाट बच्नको लागि सिमानाकामा कडाइ गरिएको हो । लकडाउनको कारण सीमा क्षेत्र शिल हुँदा सीमा क्षेत्रको आवागमन ठप्प भएपनि अनाधिकृत तरिकाले कोही पनि आवत जावत गर्न नपाओस्  भनेर सीमा क्षेत्रको निगरानीमा कडाई गरिएको सर्लाहीका  प्रमुख जिल्ला अधिकारी सुरेन्द्र पौडेलले  जानकारी दिएका छन् । उनले लकडाउनको अवस्थामा सीमा क्षेत्रबाट लुकीछिपि आएको वा आउन सक्ने अवस्थालाई कडाई गर्न  सीमानाकहरुमा सशस्त्र प्रहरीको निगरानी बढाईएको बताएका छन् ।
    स्थानीय सर्वसाधारण तथा तश्करहरु भारतबाट ल्याइएका सामानहरु ओसारपसार गर्न सबैभन्दा बढी चोरबाटोको प्रयोग गर्ने गरेकाले त्यस्ता चोरबाटोहरुमा पनि सशस्त्र प्रहरी र नेपाल प्रहरीले कडाइका साथ निगरानी बढाएका छन् ।
   अहिलेको वर्तमान स्थितिमा  कोरोना भाइरसको संक्रमण समुदाय स्तरमा फैलिसकेकोले यस्तो अवस्थामा कोरोना संक्रमण नियन्त्रण तथा रोकथामका लागि स्थानीय प्रशासनले गरेको प्रयासमा साथ दिन प्रजिअ पौडेलले जिल्लाबासी सँग अनुरोध गर्नुभएको छ ।सर्लाहीमा मंगलबार सम्म १ हजार ९० जनामा कोरोनाको संक्रमण देखिसकेको छ भने अझ बढ्ने क्रम जारी छ ।