तराईमा यसपालिको दशैं,तिहार र छठ ईतिहासमै सबैभन्दा दु:खद पर्व हुने व्यवसायी तथा स्थानीयहरुको भनाई
Video सहित.....📹️
मनोज यादव-----
सर्लाही ,असोज ५
नेपालीहरुको सबैभन्दा ठूलो चाड दशैं सुरु भइसकेको छ । यतिबेला बजारमा दशैंको लागि किनमेल गर्ने मानिसहरुको चहलपहल हुनुपर्ने थियो तर कोरोना भाइरसका कारण बजारको रौनक घटेको छ । किनमेल गर्ने मानिसहरू घरबाट बाहिर ननिस्केका कारण सर्लाही लगायत प्रदेश न-२ का आठवटै जिल्लाका सहर तथा बजार अहिले सुनसान बनेका छन् ।यसको मार सबैभन्दा बढी खाद्यान्न तथा कपडा पसलहरुमा परेको छ ।
झन्डै सात महिना लामो लकडाउन केही बन्देजहरु सहित खुला गरिएको छ । सरकारले लकडाउन खुकुलो गरेको भएपनि कोरोनाको संक्रमण भने घटेको छैन ।प्रदेश २ का जिल्लाहरुमा अहिले पनि संक्रमण दर बढ्दो क्रममा छ । लामो समयदेखिको लकडाउनले दैनिक काम गरेर खानुपर्ने वर्गको रोजिरोटीमा समस्या आएपछि सरकारले चौतर्फी दबाबमा लकडाउन खुकुलो बनाए पनि असावधानी पुर्वक हिँडडुल गर्ने अवस्था भने छैन । लकडाउनका कारण देशका उद्योग धन्दाहरु ठप्प भए, धेरैले रोजगार गुमाए , साना व्यवसायीहरुले त आफ्नो व्यवसायनै बन्द गरे । विभिन्न कार्यालयमा कार्यरत केही कर्मचारीहरु बाहेककाहरुको आम्दानीमा कमी आएकाले यसपाली खुलेर चाड मान्ने मुडमा कोही पनि देखिंदैन । ठुलो परिवार भएका का लागि यसपालिको दशै ,तिहार र छठ खल्लो हुने निश्चित छ । पहिलाको जस्तो चाडवाडमा महंगा सामानहरु खरिद गर्ने अवस्थामा निकै कम उपभोक्ताहरुको रहेको देखिन्छ ।
तराईका जिल्लाहरुमा चाडपर्वको बेला सबैभन्दा बढी खाद्यान्न तथा लत्ताकपडाको खरिद बिक्री हुनेगर्छ । व्यवसायीहरुको कमाउने बेला पनि यही हो । तर कोरोना कहरका कारण व्यापार नहुँदा उनीहरु उत्साही छैनन् ।खाद्यान्नका खुद्रा व्यापारीहरु यसपालीको दशै,दिपावली तथा छठ पर्वमा व्यापार राम्रो हुने कुनै लक्षण नदेखिएको बताउँछन् । लकडाउन खुकुलो भए पनि कोरोना संक्रमण जस्ताको त्यस्तै रहेकोले सोंचे जस्तो व्यापार हुने अवस्था नरहेको मलंगवाका किराना व्यवसायी बिक्की यादवले बताए । पसलमा भएका सामान खासै नबिकेको र होलसेलरहरु पनि दशै ,तिहार लगायतका चाडपर्व प्रति उत्साहित नदेखिएको व्यवसायी यादवको भनाई छ। भएका सामानहरु पनि नबिकेका कारण थप लगानी गर्न अप्ठ्यारो भएको उनले सुनाए ।
उपभोक्ताको आम्दानी घटेकाले पनि यसपालिको दशै,तिहार र छठमा पहिलेको जस्तै रौनक नहुने जानकारहरुको अनुमान छ
लकडाउन भर्खर सुरु हुँदा खाद्यान्नको व्यापार मारामार भएको थियो । घरभित्र थुनिएका स्थानीयबासीहरु मिठा-मिठा परिकार खाएर केही दिन बिताए । खाद्यान्नको विक्री पहिलेभन्दा उच्च भयो । तर, अहिले सबै उपभोक्ताहरु सिथिल भएका छन् ।लामो लकडाउनले गर्दा सबैको खल्ति खालि भएको छ ।
कपडा व्यापारीहरुको अवस्था पनि खाद्यान्न व्यवसायीको जस्तै छ । विगतमा दशैं र छठका लागि नयाँ कपडा किन्नेहरुको पसलहरुमा निकै ठूलो भिड लाग्ने गरेको थियो , तर यसपालि पसलमा सोचेजस्तो ग्राहकहरु नआएकाले व्यापार घाटामा जाने निश्चित छ व्यापारीहरुले गुनासो गरे ।
यसवर्षको दशैं,तिहार र छठ ईतिहासमै सबैभन्दा दुःखद हुने जानकारहरुले अनुमान गरेका छन् ।
No comments:
Post a Comment