सर्लाही ,जेष्ठ २८ ।
यसवर्ष धानको बीउ छर्ने र रोपाइँ गर्ने सिजन लकडाउनकै बेला परेकाले सर्लाहीमा धानको बीउ र रासायनिक मलको चरम अभाव श्रृजना भएको छ । यहाँका किसानहरु रासायनिक मलको लागि भारतीय बजारको भर पर्दै आएकाले सिमानाका बन्द भएपछि उनीहरूलाई बीउ र मलको अभाव भएको हो ।
कोरोना भाइरस महामारीका कारण भारतबाट रासायनिक मल आयात गर्न नसकिएकाले मलको अभाव भएको स्थानीय किसान ले बताएका छन् । सर्लाहीका आधा भन्दा बढी भुभाग नेपाल भारत सिमासँग जोडिएको छ ।दशकौंदेखि यस क्षेत्रका किसानहरु रासायनिक मलको लागि भारतीय बजारमै जाने गरेका छन् । नेपाली बजारको तुलनामा भारतीय बजारमा मूल्य पनि आधाले फरक पर्ने भएकोले पनि यहाँका किसानहरु मलका लागि सिमा नजिकैको भारतीय बजार जाने गरेका छन् । तर सिमानाका बन्द भएकोले यसवर्ष किसानलाई धान रोपाइँमा समस्या पर्ने भएको छ ।
बैशाखको अन्तिम सम्ममा धानको बीउ राखि सक्नुपर्ने भएपनि लकडाउनका कारण पसल नखुल्दा बीउ र मल खरिद गर्न समस्या भएको गोडैताका किसान अजोधी रायले बताए ।
गोडैता नगरपालिका स्थित रामबन बजारमा एग्रोभेट संचालन गर्दै आएका व्यापारी राधेश्याम कुशवाहाले यसवर्ष किसानहरुलाई बीउ र रसायनीक मलको अभाव हुने बताए।अहिले वर्षे धान र विभिन्न तरकारी लगायतको सिजन भए पनि नयाँ बीउ ल्याउन नपाएको र केही पुरानै बीउमात्रै बिक्री गर्नुपरेको ब्यापारी कुशवाहाले बताए । बिहान बेलुका एकछिन पसल खुल्दा पहिलेदेखि मौज्दात रहेका विभिन्न जातका मौसमी तरकारीहरुको बीउ पनि सकिएको छ तर बीउको माग भने भने उच्च रहेको उनले बताए ।दैनिक जसो १५-२० जना स्थानीय किसानहरु धानको बीउ र रसायनिक मल खोज्न आउने गरे पनि बीउ र रसायनिक मल ल्याउन नपाउँदा समस्या परेको उनको भनाइ छ ।
लकडाउनका कारण ग्रामीण क्षेत्रका किसान बजारसम्म पुग्न नसक्ने र बजारमा पनि बीउ अभाव भएकाले यस वर्ष किसानलाई मर्का पर्ने गरेको एग्रोभेटका संचालकहरु बताउँछन् । बीउ नै नपाइने र पाइए पनि ल्याउन समस्या भएकाले बीउ मागअनुसार बिक्री गर्न नसकिएको व्यापारीको भनाइ छ ।
यता किसानलाई खेतमा छरिसकेको धानको बीउका लागि चाहिने रासायनिक मलको समेत चिन्ता परेको छ । किसानले मल नपाउँदा थप समस्या झेल्नुपर्ने र उत्पादनमा समेत ह्रास आउनेमा उनीहरु चिन्तित भएका छन् ।
No comments:
Post a Comment