मनोज यादव-----
सर्लाही ,जेठ ३ ।
सर्लाहीको दक्षिण–पश्चिम भेग कै ठूलो बजारको रुपमा रहेको बरहथवामा कोरोना संक्रमण लाई मध्यनजर गर्दै शुक्रबारदेखि खाद्यान्न पसल व्यवसाय समेत बन्द गरिएको छ ।
निरन्तरको लकडाउनले जनजीवन प्रभावित भएको र नागरिकले चामल, दाल, नुन तेल समेत किन्न नपाएको भन्दै नगरपालिकाले निर्णय नै गरेर केही दिनअघिबाट बिहान केही घण्टा खाद्यान्न पसल खोल्न अनुमति दिएको थियो । तर खाद्यान्न पसलको आडमा अन्य पसल व्यवसाय समेत खोलेर भीडभाड गर्न थालेपछि अब बजारलाई नै पूर्णरुपमा लकडाउन गर्ने निर्णय गरिएको बरहथवा नगरपालिकाले जनाएको छ । गत बिहिवार साँझ अबेरसम्म भएको सर्वपक्षिय छलफलबाट औषधि पसल, ग्याँस डिपो र पेट्रोल पम्प बाहेक अन्य सबै पसल व्यवसाय बन्द गर्ने निर्णय भएको बरहथवाका नगरप्रमुख देवानन्द महतोले जानकारी दिए । पछिल्लो समय कोरोना भाईरसका संक्रमित बढ्दै गएपछि स्थानीय प्रशासन, पालिका तथा अन्य निकायले भीडभाड कम गराउने, लकडाउनको कार्यान्वयन गर्ने जस्ता कार्यमा जोड दिन थालेका छन् ।तर बजार क्षेत्रमा भने भीडभाड कम भएको छैन् ।
यस्तै पुर्व पश्चिम राजमार्गमा पर्ने सर्लाहीको प्रमुख बजार लालबन्दीका बैंकहरु अब हप्तामा दुई दिन मात्रै खुल्ने भएका छन् । नगरभित्रका बैंकका प्रतिनिधि र नगरपालिकाका पदाधिकारीहरुबीच गत बिहिवार भएको छलफलबाट अत्यावश्यक कामका लागि हप्तामा दुई दिन आइतवार र बुधवार बिहान १० बजेदेखि दिउँसो १ बजेसम्म बैंकहरु सञ्चालन गर्ने निर्णय भएको नगरपालिकाका प्रमुख प्रशासकीय अधिकृत वासुदेव तिमल्सिनाले बताए ।
मन्त्री परिषद्को बैठकले बैंक तथा बित्तीय संस्थामा कर्मचारीको संख्या बढाउने निर्णय गरेपछि लालबन्दीका सबै जसो बैंक केही दिनदेखि दैनिकजसो खुलिरहेका थिए । सामाजिक सुरक्षा भत्ता लिन यहाँका केही बैंकहरुमा सेवाग्राहीको भीड नै लागेको थियो ।
यसैगरी हरिवन नगरपालिकाले पनि शुक्रवारदेखि जेठ ५ गतेसम्म आईतवार एक दिन बिहान ११ बजेदेखि १ बजेसम्म खोल्न र अन्य दिन नगर भित्रका सबै बैंक, सहकारी र बीमा संस्थाहरु बन्द गर्न सूचना जारी गरेको नगरप्रमुख गणेश प्रसाईले लोकतन्त्रलाई जानकारी दिनुभएको छ ।
उता सर्लाहीको दक्षिणी भेगका पर्ने गोडैता नगरपालिकाले कोभिड–१९ को बढ्दो प्रकोपलाई मध्यनजर गर्दै बिहीबारबाट जेठ ५ गतेसम्मका लागि नगरपालिकाको अति आवश्यक सेवा बाहेक अन्य सबै सेवा बन्द गरेको नगरप्रमुख देवेन्द्र यादवले बताएका छन् । जिल्लाका अन्य केही पालिकाले पनि अत्यावश्यक बाहेक अन्य सेवा बन्द गरेका छन् ।
No comments:
Post a Comment